Qazaq halyq ertegileriniń beıne nusqasy shyqty
Respýblıkalyq «Qoǵamdyq kelisim» ortalyǵy búginnen bastap YouTube jelisindegi Qogam Life kanalyna jańa ertegi salyp otyrady, dep habarlaıdy Almaty-akshamy.kz
Qazaq jáne elimizdegi 20-dan astam etnostyń halyq ertegileriniń beıne nusqasy shyqty. Respýblıkalyq «Qoǵamdyq kelisim» ortalyǵy búginnen bastap YouTube jelisindegi Qogam Life kanalyna jańa ertegi salyp otyrady. Balalarǵa arnalǵan kontent «Qazaqstan halqy ertegileri» kitaby boıynsha daıyndalǵan. Bul kitap jyl basynda jaryq kórgen. Tırajy shekteýli bolǵandyqtan, ertegilerdi barynsha qoljetimdi ári tıimdi etý úshin onyń beıne nusqasy da jasalǵan.
"Birinshi kitap 4-7 jas, ekinshisi 8-11 jas aralyǵyndaǵy balalarǵa arnalǵan. Eki tomnan turady. Jas erekshelikteri eskerilgen. Sonymen qatar, ár ertegi kólemi de 3 mınýtqa deıin. Balalar tez qabyldaý úshin jalyqtyrmaıtyn formatta shyqty", - dedi «Qoǵamdyq kelisim» RMM dırektory Ǵalymjan Qusmanǵalı.
"Ertegi oqyp ósken balanyń qıaly ushqyr bolady. Ertegi oqyp ósken balanyń júreginde meıirimdilik erte oıanady. Akademıalyq tilmen emes, jatyq tilmen aýdaryp jatqan kezde ekinshi jumys júrip jatty. Iaǵnı beıne formaty jasaldy", - dedi jazýshy Kamal Álpeıisova.
Sondaı-aq búgin «Khancast» jobasynyń tusaýkeseri ótti. Bul podkast - Qazaq handyǵy tarıhyndaǵy aqtańdaqtardy anyqtaý úshin analıtıkalyq jáne salystyrmaly zertteý elementterinen quralǵan suhbat. Jańa aýdıoónimdi halyqaralyq platformadan tyńdaýǵa bolady.