«Men túsinbeımin» qysqametrajdy fılmine halyqaralyq kınofestıvaldiń bas júldesi berildi
Qazaqstandyq rejıser Kamıla Norýsovanyń «Men túsinbeımin» qysqametrajdy fılmi Koreıanyń Yechon qalasynda ótken halyqaralyq kınofestıvaldiń bas júldesin jeńip aldy, dep habarlaıdy Almaty-akshamy.kz
10 mınýttyq týyndyda ınternasıonaldyq otbasynyń ómiri sıpattalady. Sújet boıynsha, koreı azamaty men onyń Qazaqstannan kelgen áıeli bir-biriniń tilin túsinbeıdi. Bir kúni jas jubaılar aýdarma jasaıtyn qulaqqap satyp alady. Fılmdegi basty rólderdi qazaqstandyq stýdent Aıda Azat pen ońtústikkoreıalyq Im Djon Mýk somdaǵan.
Aıta keteıik, Kamıla Norýsova – Talǵar qalasynyń týmasy. 4 jyldan beri Ońtústik Koreıada turady.
Jalpy baıqaýǵa 11 elden 948 fılm qatysqan. Barlyǵy uıaly telefonǵa túsirilgen.
«Festıválden keıin kóptegen rejıser birlesken joba jasaýdy usynyp otyr. Men 2 elde jumys isteýdi qalaımyn. Maǵan Qazaqstannyń tabıǵaty unaıdy. Elge baryp fılm túsirgim keledi», - deıdi Kamıla Norýsova.