Forým jumysyna tuńǵysh ret Qazaqstannyń EQYU, BUUDB, IýNISEF, Frıdrıh Ebert qory, IýNESKO, IýSAID sıaqty halyqaralyq seriktesteri qatysýda.
X Azamattyq forýmnyń jumysy 22-26 qarasha aralyǵynda Nur-Sultan jáne Almaty qalalarynda 5 kún boıy onlaın jáne oflaın formatta da ótedi, dep habarlaıdy Almaty-akshamy.kz
Úkimettik emes sektormen ózara is-qımyl salasynda Qazaqstan Táýelsizdiginiń 30 jyldyǵynyń eń iri oqıǵasy: «Qoǵam men memlekettiń turaqty damýy múddesindegi áriptestiktiń 30 jyly» taqyrybymen Qazaqstannyń X Azamattyq forýmy bastaldy.
Forýmdy Aqparat jáne qoǵamdyq damý mınıstri Aıda Balaeva men Qazaqstannyń Azamattyq alánsynyń prezıdenti Baný Nurǵazıeva ashty.
Mınıstr óz sózinde X Azamattyq forýmnyń jumysy Qazaqstan Táýelsizdiginiń 30 jyldyǵynyń qorytyndylaryna arnalǵan mańyzdy oqıǵa ekenin atap ótti.
Táýelsizdik tańynda Qazaqstannyń azamattyq sektory ondaǵan ÚEU-dan bastalǵanyn eske salǵan Aıda Balaeva, búginde elimizdiń bul salasy Ortalyq Azıadaǵy eń damyǵan qoǵamdyq ınstıtýtqa aınalǵanyn aıtty. Máselen, jyl saıyn qazaqstandyq «úshinshi sektordyń» qatary orta eseppen 150 jańa qatysýshyǵa artyp keledi.
«Azamattyq forým – bul keıbireýler dáıeksiz aıtatyndaı «ÚEU ókilderiniń deklaratıvti-hattamalyq jıyny» emes, qoldanbaly ıdeıalar men bastamalar týyndaıtyn, mınıstrler men ákimder azamattyq belsendilermen teń dárejede birlesken is-qımyl josparlaryn jasaıtyn, jekelegen áleýmettik problemalardy sheshýge memleket ÚEU-lardy tartatyn naqty jumys prosesi», - dedi mınıstr.