Memlekettegi turaqsyz epıdemıologıalyq ahýaldyń áseri eskerildi.
Ulttyq bank bazalyq mólsherlemeni 9,25%-ǵa deıin kóterdi, dep habarlaıdy Almaty-akshamy.kz.
«Qazaqstan Respýblıkasy Ulttyq Bankiniń Aqsha-kredıt saıasaty jónindegi komıteti bazalyq mólsherlemeni jyldyq 9,25% deńgeıinde +/- 1,00 p.t. paıyzdyq dálizben belgileý týraly sheshim qabyldady. Tıisinshe ótimdilikti usyný jónindegi turaqty qoljetimdi operasıalar boıynsha mólsherleme 10,25%, al ótimdilikti alý jónindegi turaqty qoljetimdi operasıalar boıynsha mólsherleme – 8,25% bolady», – delingen Ulttyq banktiń baspasóz qyzmetiniń habarlamasynda.
Aqsha-kredıt saıasatyn oılastyrylǵan túrde kúsheıtý ınflásıalyq spıráldi bosatý qaýpiniń aldyn ala bilý jáne 2022 jyly ınflásıany 4-6% nysanaly dálizge qaıtarý qajettiginen týyndady.
Bul rette iskerlik belsendiliktiń qalpyna kelýine álemdegi, atap aıtqanda, Qazaqstandaǵy turaqsyz epıdemıologıalyq ahýaldyń áseri eskerildi.
Mólsherlemeniń artýy teńgelik aktıvterdiń tartymdylyǵyn qoldaıdy, bul jaǵymsyz tepe-teńdikti boldyrmaıtyn kútýlerdi qalyptastyrý maqsatynda valúta men aqsha naryqtarynda baǵa belgileýdiń tıimdiligin arttyrady.
Sheshim suranys tarapynan ekonomıkadaǵy usynys pen turaqty proınflásıalyq qysym arqyly týyndaǵan ınflásıalyq táýekelderge negizdelgen. Inflásıa boljamdardan joǵary qalyptasady, al baǵanyń odan ári ósýine qatysty kútýler joǵary jáne bekitilmegen bolyp qalýda. Ekonomıkalyq ósim men tutynýshylyq belsendilik qarqynynyń tez qalpyna kelýi aıtarlyqtaı fıskaldy ımpúlspen proınflásıalyq úrdisti qalyptastyrady.
Sonymen birge jalpy álemdik deńgeıde azyq-túlik baǵasy kóterilip jatqan shaqta azyq-túlik taýarlarynyń jekelegen toptaryna baǵanyń ósýi sekildi eleýli faktorlar, jetkizý tizbegindegi irkilister, shıkizat pen materıaldar baǵasynyń ulǵaıýy kezinde óndirýshiler baǵasynyń ósýi, sondaı-aq retteletin baǵalardyń saqtalyp otyrǵan ósý áleýeti usynys jaǵynda shoǵyrlanǵan. Aqsha-kredıt saıasatyndaǵy transmısıalyq tetiktiń usynystyń kútilmegen ózgerisine yqpaly shekteýli bolatynyn, al ınflásıanyń bul ózgeristerge beıim keletinin halyqaralyq tájirıbeniń ózi kórsetip otyr. Osy tájirıbeni negizge ala otyryp, Ulttyq Bank óz sheshimimen joǵary ınflásıalyq kútýlerge baılanysty suranys tarapynan bolatyn táýekelderge barynsha den qoıady.