Qazaqstannyń Tájikstanǵa 60 taýar túri eksportyn ulǵaıtýǵa áleýeti bar. Bul týraly Qazaqstan-Tájistan bıznes forýmynda Premer-Mınıstrdiń orynbasary - Saýda jáne ıntegrasıa mınıstri Serik Jumanǵarın aıtty, dep habarlaıdy Almaty-akshamy.kz. QazAqparatqa silteme jasap.
«Bizdiń boljamymyz boıynsha, ortaazıalyq óńirdegi saýdanyń jıyntyq áleýeti 10 mlrd dollardan asady. Qazirgi ýaqytta Qazaqstanda Tájikstanmen birlesken 418 kásiporyn jumys isteıdi, onyń 416-sy – shaǵyn kásiporyn. Qazaqstannyń 2005 jyldan bastap Tájikstan ekonomıkasyna salǵan ınvestısıasynyń kólemi – shamamen 132 mln dollar, al Tájikstannan ınvestısıa aǵyny – shamamen 21 mln dollar. Pandemıanyń aıaqtalýymen biz yntymaqtastyqtyń barlyq baǵyty boıynsha ózara is-qımylymyzdy arttyratynymyzǵa senimdimin», - dedi Serik Jumanǵarın.
Vıse-premer ýaqyt óte kele eki el bıznes-toptarynyń ókilderi arasyndaǵy iskerlik baılanys nyǵaıa túsetindigin atap ótti.
«Qazirdiń ózinde biz ózara saýdadaǵy áleýetti kórip otyrmyz. Atap aıtqanda, Qazaqstannyń jalpy somasy 140 mln dollar bolatyn 60 taýar pozısıasy boıynsha eksportty ulǵaıtý áleýeti bar. Bul – jetkizilimniń oń ósýi baıqalatyn óńdelgen ónimderdiń taýarlary. Sonymen qatar, olardy jeńildikti sharttarmen usynýǵa daıyn qyzmet kórsetýshilerdiń qyzyǵýshylyǵy zor. Olardyń ishinde aýyl sharýashylyǵy salasy úshin Jerdi qashyqtyqtan zondtaý jáne spýtnıktik baılanys qyzmetterin, İT qyzmetterin atap ótýge bolady. Memlekettik basqarý men ǵylymı-ınnovasıalyq qyzmettiń sıfrlyq transformasıasy salasyndaǵy yntymaqtastyqty damytýǵa ázirlik bar», - dedi ol.