2024 jyldyń 1 qyrkúıeginen bastap Qostanaı oblysyndaǵy barlyq jalpy bilim berý uıymdarynda BilimClass elektrondy jýrnaly men kúndeligi modýli engiziledi. Osylaısha, óńir mektepterinde buryn qoldanysta bolǵan «Kúndelik» júıesinen bas tartady, dep habarlaıdy aqshamnews.kz
«Qostanaı oblysynyń bilim basqarmasy men «Bilim Land» JSHS arasynda bıylǵy shilde aıynda yntymaqtastyq týraly memorandýmǵa qol qoıyldy. BilimClass júıesine kóshý barysynda barlyq bilim berý uıymdaryna muǵalimder, oqýshylar jáne olardyń ata-analary úshin tegin sıfrlyq resýrstar usynylady. Mektepter, synyptar jáne pánder boıynsha bilim sapasyn aýdandyq jáne oblystyq deńgeıde monıtorıń júrgizý múmkindigi qarastyrylǵan. «Kúndelik» júıesinen derekterdi júktep alǵannan keıin qujattardy tegin saqtaý jáne BilimClass júıesine avtomatty túrde derekterdi júkteý múmkindigi beriledi», – dep habarlady oblystyń bilim basqarmasy.
Sonymen qatar, oqýshylarǵa halyqaralyq zertteýlerge (PISA, TIMSS, PIRLS) daıyndyq kezinde fýnksıonaldyq saýattylyqty qalyptastyrý jáne baǵalaý úshin Bilimcenter.kz modýline tegin qoljetimdilik beriledi. Monıtorıń jáne biliktilikti arttyrý kýrstarynan ótken kezde sertıfıkattaý múmkindigi de qarastyrylǵan. Basqarma platformanyń jarnamasyz jumys isteıtinin naqtylady.
Ótken jyldan bastap Aktóbe oblysynyń mektepteri de BilimClass elektrondy kúndeligine kóshken bolatyn.