Arktıkalyq sýyq.
«Qazgıdromet» mamandary 10-12 qańtar kúnderi aýa raıy qandaı bolatynyn boljady, dep habarlaıdy Almaty-akshamy.kz.
Sýyq arktıkalyq aýamen toltyrylǵan soltústik antısıklony Qazaqstan aýmaǵy arqyly ońtústik óńirlerge qaraı jyljýyn jalǵastyrýda. Osymen baılanysty qatty aıaz elimizdiń kóp bóliginde saqtalady.
«Ońtústik pen ońtústik-shyǵystyń taýly aımaqtarynda qatty qar jaýady dep kútilýde. Aýa temperatýrasy batysta túnde 27-35, kúndiz 15-25 aıaz, respýblıkanyń ońtústik-batysynda túnde 12-23, kúndiz 5-15 aıaz, soltústik-batysta jáne soltústikte túnde 32-40 aıazdan 20-30 aıazǵa deıin, kúndiz 27-35 aıazdan 13-22-aıazǵa deıin, ortalyqta negizgi fon túnde 35-40, óńirdiń ońtústiginde 25-30 aıaz, kúndiz 20-30 aıazdan 15-26 aıazǵa deıin, shyǵysta aýa temperatýrasy túnde 20-33 aıazdan 30-43 aıazǵa deıin, kúndiz 15-23 aıazdan 23-33 aıazǵa deıin, ońtústikte, ońtústik-shyǵysta túnde 10-20 aıazdan 20-31 aıazǵa deıin, kúndiz 8-16 aıazdan 12-23 aıazǵa deıin tómendeýi kútiledi», - delingen sınoptıkterdiń habarlamasynda.