Qazaqstan Respýblıkasy Prezıdentiniń keńesshisi Málik Otarbaev Qazaq ulttyq qyzdar pedagogıkalyq ýnıversıtetiniń profesorlyq-oqytýshylyq quramy men stýdentterimen kezdesti.
«Qazaqstannyń bolashaǵy: birlik, damý jáne jańǵyrý» taqyrybynda ótken ashyq dıalog alańy Memleket basshysy Qasym-Jomart Toqaevtyń Býrabaıda ótken IV Ulttyq quryltaıda sóılegen baıandamasyn talqylaýǵa arnaldy, dep habarlaıdy aqshamnews.kz.
Kezdesý barysynda Prezıdent keńesshisi oqý ornyna Qasym-Jomart Toqaevtyń sálemin jetkizdi. Ol Prezıdenttiń Ulttyq quryltaıdaǵy baıandamasynyń máni men mańyzyn túsindirip, eldiń basty damý baǵdaryn aıqyndaıtyn qujat retinde quryltaıdyń strategıalyq rólin atap ótti.
«Prezıdent keńesshisi retinde birqatar aımaqtarda boldym. Aldaǵy ýaqytta da osyndaı kezdesýlerdi barlyq óńirlerde jalǵastyramyz. Sebebi Ulttyq quryltaı – bul tek pikir almasatyn oryn emes, bul – naqty sheshimder qabyldanatyn, el bolashaǵyn aıqyndaıtyn saıası ınstıtýt», – dedi Málik Otarbaev.
QyzPU Basqarma Tóraǵasy – Rektory Gúlmıra Qanaı óz sózinde Ulttyq quryltaıda kóterilgen ózekti máselelerge toqtalyp, bilim berý mekemeleriniń memleket pen qoǵam arasyndaǵy senim kópiri retindegi rólin atap ótti. Sondaı-aq Memleket basshysynyń «Adal azamat» bastamasy, ulttyq qundylyqtar men rýhanı tárbıe tóńiregindegi ustanymdaryn qoldaıtynyn bildirdi.
Kezdesý aıasynda ýnıversıtet oqytýshylary men belsendi stýdentteri óz kózqarastaryn ortaǵa saldy. Qazaq ádebıeti kafedrasynyń dosenti, f.ǵ.k. Lázzat Ádilbekova «Ulttyq birlik – turaqty damýdyń negizi» taqyrybynda baıandama jasap, Qazaqstan Prezıdentiniń bastamalary men strategıalyq baǵdarlamalaryna toqtaldy.
«Qazaqstan – BUU Elektrondy úkimet reıtıńi boıynsha alǵashqy 25 memlekettiń qatarynda. «Ulttyq qor – balalarǵa», «Keleshek» baǵdarlamasy, sapaly bilim men medısınaǵa bólingen qomaqty ınvestısıalar – munyń barlyǵy ulttyń keleshegi úshin jasalyp jatqan naqty qadamdar», – dedi Lázzat Ádilbekova.
Ol sondaı-aq Memleket basshysynyń «Ádiletti, Qaýipsiz, Taza, Qýatty Qazaqstan» qurý ıdeıasyn qoldap, bul baǵyttaǵy árbir azamattyń róli erekshe ekenin aıtty.
Jıyn sońynda ýnıversıtet ujymy Memleket basshysynyń reformalaryn tolyq qoldaıtynyn bildirip, ulttyq qundylyqtardy dáripteýge, bilim men ǵylym salasyn damytýǵa belsendi úles qosa beretinin jetkizdi. Málik Otarbaev ýnıversıtet ujymyna sáttilik tilep, el bolashaǵy – bilimdi de maqsatshyl jastardyń, ásirese qazaq qyzdarynyń qolynda ekenin atap ótti.