Zıatkerlik jarysqa 18 elden júzden astam oqýshy qatysty.
Balqan olımpıadasynda qazaqstandyq oqýshylar 1 kúmis jáne 4 qola medal jeńip aldy. Zıatkerlik jarysqa 18 elden júzden astam oqýshy qatysty. Komandalyq esepte Qazaqstan ulttyq quramasy 6-shy orynǵa turaqtady, dep habarlaıdy Almaty-akshamy.kz QR Bilim jáne ǵylym mınıstrligine silteme jasap.
Elimizdiń atynan Nur-Sultan, Almaty jáne Qaraǵandy qalalarynan 6 oqýshy qatysty. Jeńimpazdardyń qatarynda: kúmis medal ıegeri Taır Satýbaldın, qola júldegerler: Nurasyl Ábdirazaq, Rahım Baımýrzın, Iýrıı Ten, Batyrhan Sakenov jáne Qurmet gramotasymen Sam Fetýllah marapattaldy.
«Olımpıadanyń týrnırlik kúninde jas matematıkterdiń aldyna qıyn mindet qoıyldy. Olar tórt tapsyrmany sheshýi tıis boldy. Bizdiń oqýshylar Balqan elderi, sondaı-aq Ulybrıtanıa, Italıa, Ázirbaıjan, Ózbekstan jáne Qyrǵyzstan elderiniń bilim alýshylary qatysqan jarysta jaqsy nátıjeler kórsetti», - dep atap ótti «Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshov.
Bıyl matematıkadan Balqan olımpıadasy 6-10 qyrkúıek aralyǵynda ótti.