Saltanatty ashylý rásimine Qorǵanys mınıstriniń birinshi orynbasary – Qarýly kúshter Bas shtabynyń bastyǵy general-leıtenant Sultan Qamaletdınov, ákimdik pen qoǵam ókilderi, Qarýly kúshterdiń ardagerleri, sondaı-aq jergilikti áskerı basqarý organdarynyń qyzmetkerleri qatysty, - dep habarlaıdy Aqshamnews.kz.
Jańa komandalardy qalyptastyrý pýnkti azamattardy merzimdi áskerı qyzmetke shaqyrý is-sharalaryn uıymdastyrý jáne ótkizýge arnalǵan. Bul mańyzdy oqıǵa aldaǵy bir jyl Ulttyq ulan quramynda qyzmet etetin 45 jas sarbazdyń Aqtaý qalasyna attanýymen tuspa-tus keldi.
Bas shtab bastyǵy general-leıtenant S. Qamaletdınov qatysýshylardy mańyzdy oqıǵamen quttyqtap, jastardyń Otanyna qyzmet etý jolynyń dál osy jınaý pýnktinen bastalatynyn atap ótti.
– Jańa ınfraqurylymdyq jobany iske qosý barlyq shaqyrý rásimderin ashyq, túsinikti jáne eń bastysy – azamattarǵa yńǵaıly etýge baǵyttalǵan. Munda shaqyrylatyn azamattarǵa tolyq aqparat alý, tıisti rásimderden ótý úshin barlyq jaǵdaı jasalǵan. Bul jańa nysan qoǵam men armıa, memleket pen jastar, búgin men bolashaq arasyndaǵy mańyzdy baılanys býynyna aınalady dep senemin, – dedi Bas shtab bastyǵy.
Jınaý pýnkti sapaly, ári ashyq jumys isteý úshin barlyq qajetti qural-jabdyqtarmen qamtamasyz etilgen. Munda medısınalyq tekserý kabınetteri, psıhologıalyq irikteý bólmeleri, kútý jáne aqparattandyrý aımaqtary, akt zaly, sport zaly men asqana bar. Barlyǵy shaqyrylatyn azamattar men qyzmetkerler úshin qolaıly jaǵdaı jasaýǵa baǵyttalǵan.
Jańa jınaý pýnktiniń ashylýy memlekettik organdar arasyndaǵy ózara is-qımyldy arttyryp, azamattardyń quqyqtaryn saqtaýdy qamtamasyz etýge, sondaı-aq olardy áskerı bólimderge jiberý prosesin baqylaýdy kúsheıtýge múmkindik beredi.
Uıymdastyrý jáne qyzmet kórsetý deńgeıi boıynsha úlgi bolatyn bul pýnkt armıany tolyqtyrý júıesiniń mańyzdy elementine aınalmaq.