Bıyl qazaqstandyqtar jeti saıysqa qatysady. Olardyń úsheýi el aýmaǵynda, tórteýi shetelde ótedi
«Teńiz kýbogy» Ázerbaıjan jerinde uıymdastyrylyp otyr, «Beıbitshilik jaýyngeri» Armenıada, «Tank bıatlony» jáne «Elbrýs sheńberi» jarystary Reseıde ótedi, dep habarlaıdy Almaty- akshamy.kz Qorǵanys mınıstrligine silteme jasap.
Qazaqstanǵa «Artılerıadan oq atý sheberleri», «Merıdıan» jáne «Taktıkalyq mergen» jarystaryna qatysý úshin ár elden áskerı qyzmetshiler kelip jatyr. Sońǵy atalǵan eki baıqaý da elimizdiń aýmaǵynda birinshi ret ótkizilip otyrǵanyn aıta ketken jón.
Al «Artılerıadan oq atý sheberleri» saıysy Jambyl oblysy Gvardeısk áskerı qalashyǵynda osymen altynshy márte ótpekshi. Bul saıysta qazaqstandyq artıllerıster árdaıym birinshi oryn alyp júr. Bıylǵy jyly da birinshi oryn alamyz degen nıet basym. Halyqaralyq dúbirli dodaǵa Ázerbaıjan, Armenıa, Belarýs, Venesýela, Zımbabve, Qazaqstan, Qyrǵyzstan, Reseı jáne Tájikstan komandalary saıysqa túspek.
«Qazaqstan Qarýly kúshteriniń basshylyǵyna saıysty osyndaı qolaıly jaǵdaı jasap, uıymdastyrǵany úshin alǵysymdy bildirgim keledi. Biz bul jerge alǵash ret kelip turǵan joqpyz. Jarysqa muqıat daıyndaldyq. Áskerı qyzmetshilerdiń kóńil-kúıi jaqsy, sátti jarys bolar degen úmittenemin», – dep atap ótti Qyrǵyz Respýblıkasy Qarýly kúshteri komandasynyń basshysy polkovnık Joodar Aıtalıev.
Aqmola oblysynyń Shýchınsk qalasynda topograftar arasynda ótetin «Merıdıan» áskerı-sporttyq jarysyna Armenıa, Belarýs, Vetnam, Qazaqstan, Qytaı, Reseı jáne Ózbekstannyń áskerı qyzmetshileri qatysady.
«Biz «Merıdıan» baıqaýyna qatysý úshin Armenıadan keldik. Munda qushaq jaıa qarsy aldy. «Býrabaı» ulttyq tabıǵı parkinde, áıgili Abylaıhan alańynda bolyp, Shýchınsk-Býrabaı kýrorttyq aımaǵynyń basqa da kórikti jerlerin kórdik. Keremet áser aldyq. Jumys isteıtin jańa jaǵdaıǵa beıimdelip, zerdeleıtin ýaqyttyń bolǵany qandaı jaqsy», – dep Armenıa komandasynyń ókili podpolkovnık Karen Machkalán alǵan áserin aıtty.
Qaraǵandy oblysynyń «Spassk» oqý-jattyǵý ortalyǵyna «Taktıkalyq mergen» konkýrsyna qatysý úshin Armenıa, Belarýs, Vetnam, Qazaqstan, Qytaı, Malı, Nıkaragýa, Reseı, Tájikstan jáne Ózbekstan áskerleriniń mergenderi keldi.
«Áskerı qyzmetshiler jaýyngerlik sheberlikterin jeke, jup bolyp, top quramynda jáne estafetalyq saıysta kórsetip, baǵyn synaıtyn bolady. Jarystardy ótkizý úshin ártúrli jaǵdaıdy ımıtasıalaıtyn nysana alańdary men atys tırleri arnaıy jasalǵan. Qatysýshylar úshin qarý-jaraq pen oq-dárilerdi qaýipsiz qoldaný sharalary jóninde nusqaýlyq ta ótkizdik», – dep túsindirdi konkýrstyń bas tóreshisi polkovnık Dıdar Aýshatov.
Qazirgi ýaqytta shetelde ótetin konkýrstarǵa qatysatyn qazaqstandyq áskerı qyzmetshiler jarys ótetin jerlerge keldi. Olar Ázerbaıjanda («Teńiz kýbogy») jáne Kabardıno-Balqar Respýblıkasynyń Terskol jerinde («Elbrýs sheńberi») jattyǵýlar men jabdyqtardy daıyndaýǵa kiristi.
Budan ózge, «Alabıno» polıgonynda tankıster jarysyna jerebe tastaý rásimi ótti. Qazaqstandyqtar birinshi dıvızıonnyń ekinshi jarysynda jasyl tústi tankte saıysatyn bolady. «Tank bıatlonyna» barlyǵy 21 komanda qatysatyny esterińizge sala keteıik.
Bizdiń áskerı qyzmetshiler Armenıada ótetin «Beıbitshilik jaýyngeri» saıysyna 10 tamyz kúni ushady.
Halyqaralyq armıa oıyndaryna 37 elden 275 komanda qatysady dep josparlanyp otyr. Bul áskerı oıyndarǵa alǵash ret Nıger men Rýanda komandalary qatysady.