Bas prokýratýra Interpoldyń Ulttyq ortalyq búrosymen birlesip, Syrtqy ister mınıstrliginiń qoldaýymen birneshe ret alaıaqtyq jasady dep kúdikke ilinip, halyqaralyq izdeýde júrgen Qazaqstan azamatshasyn Túrkıadan elge qaıtardy, dep habarlaıdy Aqshamnews.kz tilshisi.
Prokýratýra málimetinshe, kúdikti 2024 jyly Qyzylorda qalasynda azamattarǵa «arzan baǵamen altyn, zergerlik buıym jetkizip beremin» dep ýáde berip, aldap ketken. Sonyń saldarynan 8 adam japa shegip, keltirilgen materıaldyq shyǵyn kólemi shamamen 130 mln teńge bolǵan.
Aqshany alǵannan keıin áıel shetelge qashyp, boı tasalaǵan. Osyǵan baılanysty polısıa ony halyqaralyq izdeýge jarıalaǵan.
Kúdikti Túrkıa aýmaǵynda ustalyp, Qazaqstanǵa ekstradısıalanǵan. Qazirgi ýaqytta ol tergeý ızolátoryna qamaldy. Prokýratýranyń eskertýinshe, taǵylǵan aıyptar boıynsha múlkin tárkileý jáne 5 jyldan 10 jylǵa deıin bas bostandyǵynan aıyrý jazasy qarastyrylǵan.