Kólik mınıstrliginde qalaaralyq jáne qala mańyndaǵy jolaýshylar tasymaly, taksoparkter jáne taksı agregatorlary salasyndaǵy avtovokzaldar men kólik kompanıalarynyń ókilderimen kezdesý ótti.
Mınıstr Marat Qarabaevtyń tóraǵalyǵymen ótken kezdesýde mamandar qalaaralyq, oblysaralyq jáne aýdanaralyq baǵyttardaǵy jolaýshylardyń qaýipsizdigin arttyrý máselelerin, sondaı-aq zańdy jolaýshylar tasymalyn damytý jónindegi ıdeıalardy jáne koronavırýs pandemıasynan keıingi avtobýs stansıalarynyń qyzmetin qoldaý máseleleri talqylandy.
Jınalysqa júzden astam adam qatysyp, qatysýshylar erkin formatta problemalyq máselelerdi sheshý joldary men usynystaryn ortaǵa saldy, dep habarlaıdy Almaty-akshamy.kz Kólik mınıstrligine silteme jasap.
«Trassalarda ólim-jitimge ákeletin jol-kólik apattarynyń ósýi erejeler saqtalmaǵan zańsyz tasymaldaý kóleminiń artýymen bir mezgilde oryn alýda. Sondyqtan tasymaldaý salasyndaǵy tetikterdi rettep, onyń ishinde vokzal sharýashylyǵynyń tolyqqandy jumys isteýin júıeleý qajet. Osy rette sizdermen ashyq talqylaý uıymdastyryp otyrmyz», –dedi Kólik mınıstrliginiń basshysy.
Talqylaý barysynda resmı jumys isteıtin avtostansıalardyń jumysynda oryn alǵan tereń daǵdarys máselesi atap ótildi. Búgingi tańda avtovokzaldar Qazaqstannyń 3 oblysynda ǵana tıisti deńgeıde jumys istep tur. Resmı tasymaldar salasy beıresmı tasymaldaýshylarmen jáne agregatorlarmen salystyrǵanda salyqtardy tóleý, jolaýshylardy saqtandyrý, júrgizýshilerdi medısınalyq kýálandyrý, avtobýstardy reıs aldyndaǵy tekserý, tehnıkalyq bazany ustaýboıynsha teń básekelestikti joǵaltyp otyr.
Zańdy tasymaldaýshylar da osyndaı sebepterge baılanysty zańsyz tasymaldaýshylarmen básekelestikke tótep bere almaıdy. Kóleńkeli tasymaldaýshylar qazaqstandyq zańnamanyń talaptaryn oryndaý, júrgizýshilerdi áleýmettik qamtamasyz etý, tasymaldaý qaýipsizdigi sıaqty faktorlarǵa nazar aýdara qoımaıdy. Jalpy alǵanda, bul olarǵa únemdeýge aıtarlyqtaı múmkindik berip, tasymaldaý qyzmetteri úshin tómen baǵalar usyný túrindegi artyqshylyqtar beredi.
Kezdesýge qatysqan avtobýs jáne taksı júrgizýshileri taǵy bir mańyzdy máselege toqtaldy. Atap aıtqanda, zańsyz tasymaldaý qylmystyq áreketterge jol ashatyny sóz boldy. Iaǵnı, kóleńkeli salada júrgen júrgizýshiler arqyly jiberiletin ádettegi sálemdemelerdiń arasynda tyıym salynǵan zattar tasymaldanýy múmkin, sonymen birge qandaı da bir zańtalaptaryn buzǵan adamdardyń qozǵalysyna yqpal etip, olarǵa izdeý salǵan qyzmetkerlerdiń jumystaryn qıyndatady.
Sonymen qatar inDrive jáne Iandeks taksımen yntymaqtasatyn júrgizýshiler mınıstrge joldardaǵy apattylyqtyń ósýine yqpal etetin agregatorlar jumysynyń erekshelikteri týraly aıtyp berdi. Olardyń aıtýynsha, kompanıalardyń biri seriktesterdi shamadan tys jumys jasaýǵa materıaldyq turǵyda yntalandyrady eken. Júıede arnaıy aksıalar týraly habarlamalar jarıalanyp, onyń sharttaryna sáıkes júrgizýshiler belgili bir tapsyrystardy oryndaǵany úshin jaqsy bonýstarǵa ıe bolady. Máselen, aptasyna jasalǵan 180 jáne 300 sapar úshin syıaqy qarastyrylǵan. Birinshi jaǵdaıda sharttardy oryndaý úshin kún saıyn úzilissiz shamamen 12-13 saǵat, al ekinshisinde - 21-22 saǵat jumys isteý kerek. Osyndaı yntalandyrýlar men komısıalyq ustaýdyń joǵary mólsherine baılanysty júrgizýshiler qosymsha kiris úshin kádimgideı báıge uıymdastyryp, nátıjesinde jol-kólik apattarynyń sany arta túsedi.
Naryq qatysýshylary men mınıstrlik qyzmetkerleriniń áńgimesi shamamen 4 saǵatqa sozyldy. Negizgi jáne basty talaptardyń biri – tasymaldaý naryǵynyń barlyq qatysýshysy úshinteń múmkindikter qurý jáne zań talaptarynyń saqtalýyn barynsha qamtamasyz etý.
Talqylaý qorytyndysy boıynsha jolaýshylar tasymalynyń qaýipsizdigin arttyrý jáne tasymaldaý naryǵyndaǵy ekonomıkalyq jaǵdaıdy jaqsartý boıynsha birqatar usynys qabyldandy. Atalǵan usynystar jaqyn arada «avtovokzaldar», «avtobýs tasymaldaýshylary» jáne «taksoparkter men júrgizýshiler» syndy jekelegen kishi toptar arasynda egjeı-tegjeıli qaralatyn bolady.