Investorlarǵa qoıylatyn talaptar qaıta qaraldy.
Úkimet otyrysynda Qazaqstan Respýblıkasynyń Kóshi-qon saıasatynyń 2023-2027 jyldarǵa arnalǵan tujyrymdamasynyń jobasy maquldandy. Qujat boıynsha, áleýetti ınvestorlarǵa qoıylatyn talaptar qaıta qaraldy, dep habarlaıdy Almaty-akshamy.kz Inbusiness.kz silteme jasap.
İri ınvestorlarǵa 10 jyl merzimge turýǵa ruqsaty bar ınvestorlyq vızalar beriledi. Sondaı-aq azamattardy eńbek kúshi jetpeıtin óńirlerge kóship barýyn yntalandyrý da tujyrymdamanyń negizgi mindetteriniń biri bolyp tabylady. Bul rette kóship barǵandardy baspanamen, áleýmettik ınfraqurylymmen jáne jumyspen qamtamasyz etý aldyn ala pysyqtalatyn bolady.
Taǵy bir mańyzdy másele – ol shetelde jumys isteıtin qazaqstandyqtardyń quqyqtaryn qorǵaý.
"Bizdiń otandastarymyzǵa zańgerlik jáne konsýltasıalyq kómek kórsetiletin bolady. Ol úshin qazaqstandyq azamattar kóp jumys isteıtin eldermen ekijaqty kelisimder jasalatyn bolady. Qaı elde eńbek etse de, biz óz azamattarymyzdy qorǵaı alýymyz kerek", — dedi Premer-Mınıstr.
Onyń aıtýynsha, Tujyrymdamada "bir tereze" qaǵıdaty boıynsha mıgranttardyń qozǵalysyn esepke alýdyń biryńǵaı aqparattyq júıesin qurý kózdelgen.
Usynylǵan Tujyrymdamany bekitý boıynsha daýys berý rásiminen keıin Álıhan Smaıylov Tujyrymdamadaǵy bastamalardy zań júzinde ýaqytyly bekitýdi qamtamasyz etýdi jáne kóshi-qon prosesterin avtomattandyrý úshin aqparattyq júıelerdi damytý sharalaryn qabyldaýdy tapsyrdy.
Sonymen qatar Premer-Mınıstr óńir ákimdikteri sheteldik mamandardy tartý úshin kvota belgileý kezinde sol óńirge eń qajetti kadrlardyń kelýin qamtamasyz etýi jáne olardyń jumysyna baqylaýdy kúsheıtýi tıis ekenin atap ótti.