Grýzıanyń Premer-mınıstri kelesi aıdyń aıaǵynda Qazaqstanǵa kelýdi josparlap otyr
Qasym-Jomart Toqaev Qatar ekonomıkalyq forýmy aıasynda Grýzıanyń Premer-mınıstri Iraklıı Garıbashvılımen kezdesý ótkizdi, dep habarlaıdy Almaty-akshamy.kz Aqordanyń resmı saıtyna silteme jasap.
Kezdesýde ekijaqty yqpaldastyqtyń ózekti máseleleri talqylandy.
«Sizdiń nazaryńyzdy mynadaı baǵyttardaǵy yntymaqtastyqty damytý perspektıvalaryna aýdarǵym keledi. Atap aıtqanda, ózara saýda kólemin ulǵaıtý. Meniń oıymsha, biz ónimderdi ózara jetkizýdi arttyra alamyz. Qazaqstanǵa jáne Ortalyq Azıanyń basqa da elderine taýar jetkizý jaǵynan Grýzıanyń úlken qory bar. Osy baǵytta tyǵyz jumys isteýge daıynbyz», – dedi Qasym-Jomart Toqaev.
Memleket basshysy kólik-logıstıka salasynda, atap aıtqanda Qazaqstannyń Aqtaý jáne Quryq aılaqtarynyń, sondaı-aq Batýmı teńiz aılaǵynyń áleýetin paıdalana otyryp, eki el arasyndaǵy júk tasymalyn birlesip júzege asyrýdyń mańyzdy ekenin atap ótti.
Óz kezeginde Iraklıı Garıbashvılı Dohada kezdesýge ýaqyt bólgeni úshin Qasym-Jomart Toqaevqa alǵys bildirip, Grýzıanyń Qazaqstanmen aradaǵy kópjaqty ári ózara tıimdi yntymaqtastyqty odan ári damytýǵa ázir ekenin rastady. Grýzıanyń Premer-mınıstri kelesi aıdyń aıaǵynda Qazaqstanǵa kelýdi josparlap otyr.