Elimizde jergilikti atqarýshy organdardyń ruqsatymen 13 584 sheteldik azamat jumys isteıdi.
Bul týraly QR Eńbek jáne halyqty áleýmettik qorǵaý mınıstrligi málimdedi, dep habarlaıdy aqshamnews.kz.
Mınıstrliktiń málimetinshe, eńbek mıgranttarynyń negizgi shyqqan elderi:
Qytaı – 4 945 adam,
Úndistan – 1 169 adam,
Túrkıa – 1 165 adam,
Ózbekstan – 1 056 adam.
"Shetel jumys kúshin (budan ári – SHJK) tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 569 ruqsat (birinshi sanat), qurylymdyq bólimshelerdiń basshylary úshin 2 514 ruqsat (ekinshi sanat). Tartylǵan SHJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 4 711 jáne 1 010 adam. Sondaı-aq maýsymdyq jumystarǵa 1 217 adam, al korporatıvtik aýystyrý aıasynda 3 563 adam tartyldy.", delingen Qazaqstan Respýblıkasy Eńbek jáne halyqty áleýmettik qorǵaý mınıstrliginiń habarlamasynda.
Qazirgi ýaqytta Qazaqstanda SHJK paıdalanatyn 1 744 jumys berýshi bar. Olarda 377,6 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96,5% – y.
Ekonomıkalyq qyzmet túrleri boıynsha eń kóp jumys isteıtinder qurylys salasynda – 5 052 adam, aýyl, orman jáne balyq sharýashylyǵy – 1 296 adam, óńdeý ónerkásibi – 1 281 adam, taý – ken ónerkásibi jáne karerlerdi qazý – 1 263 adam, ákimshilik jáne kómekshi qyzmetter – 975 adam.
İshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. 2025 jyly jalpy kvota respýblıkadaǵy jumys kúshiniń sanyna qatysty 0,2%, 14,8 myń birlik mólsherinde belgilendi.