2022 jyly qazaqstandyqtarǵa respýblıkalyq búdjetten 2,9 trln teńgeden astam somaǵa zeınetaqy tólendi, onyń ishinde bazalyq zeınetaqyǵa 883,7 mlrd teńge, yntymaqty zeınetaqyǵa 2 022,6 mlrd teńge jumsaldy, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
2022 jylǵy jeltoqsanda respýblıkalyq búdjetten zeınetaqy tólemderine 247,4 mlrd teńge, onyń ishinde bazalyq zeınetaqyny tóleýge 75,4 mlrd teńge, yntymaqty zeınetaqyny tóleýge 172 mlrd teńge bólindi.
2023 jylǵy 1 qańtardaǵy jaǵdaı boıynsha zeınetkerler sany – 2 mln 295 myń adam.
2023 jyldyń 1 qańtarynda jıyntyq zeınetaqynyń ortasha mólsheri 108 761 teńgeni qurady, onyń ishinde yntymaqty zeınetaqy mólsheri – 74 950 teńge, bazalyq zeınetaqy – 33 811 teńge.
«2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalatynyn eske salamyz. Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady», - delingen mınıstrlik habarlamasynda.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq múlde joq bolsa, bazalyq zeınetaqy eń tómengi kúnkóris deńgeıiniń 60%-na teń bolsa, sodan keıin 10 jyldan asqan ár jyl úshin onyń mólsheri 2 %-ǵa artady. Al eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 80 %-yn quraıdy. Eńbek ótili 30 jyl nemese odan kóp bolsa, kúnkóris deńgeıiniń eń joǵarǵy mólsherinde ıaǵnı 100% belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylatyn bolsa, zeınet jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńdegi ortasha aılyq tabysyna baılanysty bolady.
Yntymaqty zeınetaqylardyń mólsheri jyl saıyn ınflásıa deńgeıinen 2% artyp kóterilýge kepildik beriledi, bul 2014 jyly qabyldanǵan zeınetaqy júıesin odan ári jańǵyrtýdyń 2030 jylǵa deıingi tujyrymdamasyna sáıkes keledi.
«2023-2025 jyldarǵa arnalǵan respýblıkalyq búdjet týraly» zańǵa sáıkes jasyna jáne eńbek sińirgen jyldaryna baılanysty zeınetaqy tólemderiniń mólsheri 2023 jylǵy 1 qańtardan bastap alynatyn mólsherden 10,5% - ǵa artty.
Sondaı-aq Memleket basshysynyń tapsyrmasyn iske asyrý sheńberinde yntymaqty zeınetaqyny esepteý úshin eń joǵary tabys mólsheri 46-dan 55 AEK-ke deıin ulǵaıtyldy.
Memlekettik bazalyq zeınetaqy tóleminiń mólsheri eń tómengi kúnkóris deńgeıiniń ulǵaıýyna baılanysty, sondaı-aq eń tómengi mólsherdiń eń tómengi kúnkóris deńgeıiniń 54% - dan 60% - ǵa deıin ulǵaıýyna baılanysty arttyryldy.
Osylaısha, 2023 jylǵy 1 qańtardan bastap bazalyq zeınetaqy tólemin eskere otyryp, zeınetaqylardyń eń tómengi mólsheri 68 223 teńgeden (2022 jyly) 77 417 teńgege deıin artty.