Zeınetkerler sany 2 mln 246 myńnan asty.
Jyl basynan beri eki mıllıonnan astam qazaqstandyqqa 1,2 trln teńgeden astam somaǵa zeınetaqy tólendi, dep habarlaıdy Almaty-akshamy.kz.
«1 maýsymdaǵy jaǵdaı boıynsha, qazaqstandyqtarǵa 1,2 trln teńgeden astam somaǵa zeınetaqy tólendi. 2022 jylǵy mamyrda respýblıkalyq búdjetten zeınetaqy tólemderine 235,4 mlrd teńgeden astam, onyń ishinde bazalyq zeınetaqyny tóleýge 71,3 mlrd teńge, yntymaqty zeınetaqyny tóleýge 163,2 mlrd teńge bólindi»,- delingen Eńbekmıni baspasóz qyzmetiniń habarlamasynda.
2022 jylǵy 1 maýsymdaǵy jaǵdaı boıynsha, zeınetkerler sany 2 mln 246 myńnan asty.
2022 jylǵy 1 maýsymdaǵy jaǵdaı boıynsha, zeınetaqy tólemderiniń ortasha mólsheri (bazalyq zeınetaqy tólemin eskere otyryp) 105 189 teńge boldy.
2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalatynyn eske salamyz.
Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary (budan ári – MZJ) tólengen kezeńder zeınetaqy júıesindegi eńbek ótiline qosylady.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54%-yn quraıdy, sodan keıin 10 jyldan asqan ár jyl úshin onyń mólsheri 2%-ǵa artady. Mysaly, eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 74%-yn, al 30 jyl bolsa, onda 94%-yn quraıdy. Eńbek ótili 33 jyl nemese odan kóp bolsa, kúnkóris deńgeıiniń eń joǵarǵy mólsherinde belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylatyn bolsa, zeınet jasyna jetkende, bazalyq zeınetaqy tólemderiniń mólsheri soǵurlym kóp bolady.
Óz kezeginde azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńdegi ortasha aılyq tabysyna baılanysty bolady.