Úkimet arnaıy baǵdarlama ázirleıdi.
Qazaqstan Úkimeti memleket azamattarynyń tabysyn arttyrý boıynsha arnaıy baǵdarlamyny júzege asyrýdy kózdep otyr. Bul týraly Eńbek jáne halyqty áleýmettik qorǵaý vıse-mınıstri Erjan Birjanov Qazaqstan Prezıdenti janyndaǵy Ortalyq komýnıkasıalar qyzmetinde ótken brıfıńte aıtyp berdi, dep habarlaıdy Almaty-akshamy.kz.
«Eńbekmıni halyqtyń tabysyn 2025 jylǵa deıin arttyrý jónindegi baǵdarlama sheńberinde jańa jumys oryndaryn qurý, halyqty jumyspen qamtýǵa járdemdesý, eńbek resýrstarynyń daǵdylaryn jetildirý jáne jastardy kásiptik baǵdarlaý jumysyn júrgizedi. Baǵdarlamanyń 38 is-sharasy Eńbekmıniniń qatysýymen iske asyrylatyn bolady, onyń 17-in mınıstrlik tikeleı júzege asyratyn bolady», - delingen Eńbekmıni baspasóz qyzmetiniń habarlamasynda.
Vıse-mınıstr halyqtyń tabysyn arttyrý jónindegi baǵdarlamada kózdelgen árbir baǵyt boıynsha júrgizilip jatqan jáne josparlanyp otyrǵan jumys týraly egjeı-tegjeıli aıtyp berdi.
Birinshi. Jańa jumys oryndaryn qurý.
Frılanserler qyzmetin sıfrlyq formatqa kóshirý maqsatynda Eńbekmıni «Platformalyq jumyspen qamtý» elektrondyq servısin ázirleıtin bolady. Bul ózin-ózi jumyspen qamtyǵan azamattardyń qyzmetin túrli platformalarda ońaı tirkeýge, qajetti mamandardy tez tabýǵa, eńbek quqyqtaryn qorǵaýǵa jáne Tapsyrys berýshilermen qarym-qatynasty resmı resimdeýge múmkindik beredi.
Memleket basshysynyń tapsyrmasy boıynsha sheteldik jumys kúshin tartýǵa kvota 3 jáne 4 sanat boıynsha 4,7 myń adamǵa qysqartyldy.
Bul sharalar halyqtyń jumyspen qamtylý deńgeıin arttyrýǵa jáne ishki eńbek naryǵyn qorǵaýǵa múmkindik beredi.
Ekinshi. Halyqty jumyspen qamtýǵa járdemdesý.
Eńbek naryǵynda arnaıy tásilderdi talap etetin birneshe topty atap ótýge bolady (jumyssyz jastar jáne NEET sanatyndaǵy jastar, kópbalaly jáne tabysy az otbasylar, sondaı-aq múgedektigi bar balalardy tárbıelep otyrǵan otbasylar).
Osyǵan baılanysty memlekettik jáne jeke derekqorlardy ıntegrasıalaý jáne olardan alynǵan aqparatty taldaý arqyly áleýmettik qoldaý men jumyspen qamtýǵa muqtaj azamattardy «Erte anyqtaý júıesin» engizý josparlanýda.