Qazaqstandyqtar jıi qyzyqtyratyn suraqtardyń biri – azamattardyń mindetti áleýmettik medısınalyq saqtandyrýǵa (MÁMS) tólegen jarnalary men aýdarymdary qaıda saqtalatyny jáne qalaı baǵyttalatyny. Áleýmettik medısınalyq saqtandyrý qory osy máselege tolyq jaýap berdi.
Qaıda saqtalady?
Barlyq jarnalar men aýdarymdar Qazaqstan Respýblıkasy Ulttyq bankiniń arnaıy shotyna túsedi. Sol jerden bul qarajat halyqqa kórsetilgen medısınalyq qyzmetterge aqy tóleý úshin medısınalyq uıymdarǵa jiberiledi.
Zańnamalyq negizder
«Mindetti áleýmettik medısınalyq saqtandyrý týraly» Zańnyń 21-babynda Áleýmettik medısınalyq saqtandyrý qorynyń ınvestısıalyq qyzmeti Qordyń aktıvterin (MÁMS qarajatyn) Qazaqstan Respýblıkasynyń Ulttyq Banki arqyly qarjy quraldaryna ornalastyrý jolymen júzege asyrylatyny kórsetilgen. Qor men Ulttyq Bank arasynda senimgerlik basqarý sharty jasalǵan.
Qalaı júzege asyrylady?
Ulttyq Bank MÁMS qarajatyn bekitilgen qarjy quraldarynyń tizbesine sáıkes qatań túrde baǵaly qaǵazdar men depozıtterge ornalastyrady. Bul júıe ınvestısıalyq tabys alýǵa jáne MÁMS júıesiniń jınaqtalǵan aktıvteriniń somasyn ulǵaıtýǵa múmkindik beredi. Alynǵan qarajat tek medısınalyq qyzmetterge aqy tóleýge baǵyttalady jáne Qordyń qajettiligine jumsalmaıdy. Qor óz erkimen MÁMS qarjysyn ornalastyrmaıdy.
2024 jylǵy jaǵdaı
2024 jylǵy 1 qańtardaǵy jaǵdaı boıynsha, 2017 jyldan beri jınaqtalǵan MÁMS aktıvteriniń qaldyǵy 933 mlrd teńgeni qurady. 2024 jyldyń tórt aıynda Qorǵa 441 mlrd teńge MÁMS jarnalary men aýdarymdar tústi, onyń ishinde 42 mlrd teńge somasyna ınvestısıalyq tabys alyndy. Medısınalyq kómekke aqy tóleýge jumsalǵan shyǵystar 354 mlrd teńgeni qurady. 2024 jylǵy 1 mamyrdaǵy jaǵdaı boıynsha Qor aktıvteriniń qaldyǵy – 1020 mlrd teńge boldy.
Ulttyq Bank bul qarajatty qysqa merzimdi depozıtterge (171 mlrd teńge), orta jáne uzaq merzimdi oblıgasıalarǵa (108 mlrd teńge) jáne memlekettik baǵaly qaǵazdarǵa (741 mlrd teńge) ornalastyrdy.
Júıeniń tıimdiligi
2023 jyly alynǵan ınvestısıalyq tabys 113 mlrd teńgeni qurady. Bul qarajat MÁMS paketiniń búdjetine qosymsha 113 mlrd teńge qosty. 2022 jylmen salystyrǵanda ınvestısıalyq kiris 1,6 ese ósti. Bul qarajat 2024 jyldyń basynda medısınalyq uıymdarmen jasalǵan sharttar boıynsha 30% mólsherinde avans tóleýge baǵyttaldy.
Táýelsiz aýdıt
Áleýmettik medısınalyq saqtandyrý qorynyń qarjy-sharýashylyq qyzmeti jáne MÁMS aktıvteri boıynsha jyl saıyn táýelsiz aýdıt júrgiziledi. Jyl qorytyndysy boıynsha qarjylyq eseptilik QR Qarjy mınıstrliginiń depozıtarııinde jáne Qordyń resmı saıtynda jarıalanady. Qor QR Úkimetinde jáne QR Úkimetiniń shoǵyrlandyrylǵan eseptiligi sheńberinde QR Parlamenti depýtattarynyń aldynda únemi esep beredi.
Bul júıe qazaqstandyqtarǵa medısınalyq qyzmetterdiń qoljetimdiligin qamtamasyz etip, jyl saıyn kórsetiletin medısınalyq qyzmetterdiń sanyn ulǵaıtýǵa múmkindik beredi.