Qazaqstandyqtardyń medısınalyq kómek alý kezinde densaýlyǵyna keltirilgen zalal óteledi.
Mundaı norma medısına qyzmetkerleriniń kásibı jaýapkershiligin saqtandyrýǵa baılanysty jańa zań jobasynda qarastyrylǵan. Bul týraly Májilis depýtaty Ǵalymjan Eleýov málim etti, dep habarlaıdy Almaty-akshamy.kz QazAqparatqa silteme jasap.
Densaýlyq saqtaý máselelerine qatysty túzetýler qazir Májiliste qaralyp jatyr. Olardy qabyldaý nátıjesinde densaýlyq saqtaý uıymdary kórsetetin medısınalyq qyzmetterdiń sapasy da arttyrylmaq.
«Tıisti zań jobasyn Densaýlyq saqtaý mınıstrligi Memleket basshysynyń Ulttyq qoǵamdyq senim keńesiniń úshinshi otyrysynda alǵa qoıǵan mindetterin iske asyrý maqsatynda ázirledi. Prezıdent medısına qyzmetkerleriniń quqyqtyq jáne qarjylyq qorǵalýy men jaýapkershiligine, onyń ishinde kásibı qyzmetine kepildik beretin júıeni ázirlep, engizýdi tapsyrǵan bolatyn.
Halyq densaýlyǵy jáne densaýlyq saqtaý júıesi týraly kodeks pen Qylmystyq kodekske, sondaı-aq «Qazaqstan Respýblıkasynyń memlekettik nagradalary týraly» zańǵa ózgerister men tolyqtyrýlar engizý usynylyp otyr. Jalpy, túzetýler medısına qyzmetkerleriniń mártebesin arttyrýǵa, pasıentter quqyqtaryn qorǵaýǵa jáne medısınalyq kómek sapasyn arttyrýǵa baǵyttalǵan», - deıdi Májilis depýtaty, dáriger, medısına ǵylymdarynyń kandıdaty Ǵalymjan Eleýov.
Zań jobasy aıasynda medısına qyzmetkerleriniń kásibı jaýapkershiligin qoldanystaǵy saqtandyrý kompanıalary arqyly boljamdy saqtandyrý júıesi ázirlengen.
«2023 jyldan bastap medısınalyq uıymnyń ózi saqtandyrýshy bolady, al 2025 jyldan bastap medısınalyq uıym men medısına qyzmetkeri saqtandyrý jarnalaryn teń úleste tóleıdi. Bul birlesken kásibı jaýapkershilikke ákeledi. Bul rette medısınalyq uıym pasıentterden nemese olardyń týystarynan túsken shaǵymdardy medıasıany jáne mamandandyrylǵan medısınalyq birlestikterdi tarta otyryp ishki aýdıt qyzmeti deńgeıinde qaraıtyn bolady. Kelispeýshilik týyndaǵan jaǵdaıda shaǵymdar saraptamalyq qorytyndy berý úshin medısınalyq jáne farmasevtıkalyq baqylaý komıtetiniń aýmaqtyq bólimshelerine beriledi», - deıdi depýtat.
Sondaı-aq, zań jobasynda medısına nemese farmasevtıka qyzmetkeriniń kásibı mindetterin tıisinshe oryndamaǵany úshin qylmystyq quqyq buzýshylyqtardy izgilendirý jáne Qylmystyq kodekstiń 317-babynyń sanksıalaryn azaıtý usynylady.
Túzetýlerge memlekettik jáne vedimistik nagradalar da engiziledi. Olar: birjolǵy tólemmen «Qazaqstan Respýblıkasynyń eńbek sińirgen dárigeri» ataǵy, «Úzdik maman» respýblıkalyq konkýrsynyń jeńimpazy.
Qazirgi ýaqytta zań jobasy qoǵam belsendileri men dárigerlerdiń qatysýymen jumys tobynda qaralyp jatyr.