Halyq sanaǵynyń saýaldaryna qazaqstandyqtardyń 39,6 prosenti onlaın rejımde jaýap berdi. Bul týraly Ulttyq statısıka búrosynyń basshysy Nurbolat Aıdapkelov málimdedi, dep habarlaıdy almaty-akshamy.kz QazAqparatqa silteme jasap.
«16 qazannan bastap sanaq saýaldaryna onlaın rejımde jaýap berý fýnksıasy toqtatyldy. 45 kún ishinde halqymyzdyń 40 prosentke (39,6% nemese 7527458 adam) jýyǵy sanaqtan ótýdiń osy jolyn tańdady. Al bizdiń ıntervúerler 3 mıllıon 792 myńnan asa adammen saýalnama júrgizgen. Osylaısha, sanaqtan ótkender úlesi 60 prosentke jetti», - dedi búro basshysy.
Onlaın sanaqtan ótpegender qazannyń 30-yna deıin úılerdi aralaıtyn ıntervúerlerdiń kómegimen sharaǵa qatysa alady. Onlaın ótkender tıisti habarlamany ıntervúerlerge kórsetýi tıis. Olarǵa saýalnama qaıta júrgizilmeıdi.
Sanaqshylarda Halyq sanaǵynyń logotıpi bederlengen kók tústi sharf pen sómke, plansheti jáne sanaq qyzmetkeri ekenin rastaıtyn kýáligi bolady. Ol kýáliktegi tirkeý nómiri arqyly ıntervúer týraly málimetterdi sanaq.gov.kz saıtynda tekserý múmkindigi bar. Odan bólek, 1446 nómirine habarlasýǵa bolady. Baılanys ortalyǵy táýlik boıy jumys isteıdi.
«Halyq sanaǵy elimiz úshin asa mańyzdy shara. Sondyqtan oǵan bir kisideı barshamyz jumylyp at salysýymyz qajet. Intervúerler de el azamattary ekenin umytpaıyq. Eńbegin baǵalap, qurmet kórsetip, túsinistik tanytýlaryńyzdy suraımyz»,- dep atap ótti Nurbolat Aıdapkelov.
Aıta keteıik, sanaqtyń negizgi kezeńi aıaqtalǵan soń, qarashanyń 1-7 aralyǵynda sanaq ótkizý ádistemesine sáıkes, baqylaý aralaý qarastyrylǵan. Bul kezeńde shamamen 10 prosent respondent qamtylady.