Ol úshin qurban2021.kz. saıtynda ótinim qaldyrý qajet.
Musylman halqy erekshe toılatyn Qurban aıt meıramy qarsańynda densaýlyq saqtaý salasynyń mamandary arnaıy úndeý jarıalady, dep habarlaıdy Almaty-akshamy.kz QazAqparat saıtyna silteme jasap.
Densaýlyq saqtaý mınıstrligi Sanıtarlyq-epıdemıologıalyq baqylaý komıtetiniń resmı ókili Erjan Baıtanaev qazaqstandyqtarǵa adamdar kóp jınalatyn rásimder uıymdastyrmaýǵa jáne ondaı sharalarǵa barmaýǵa keńes bergen.
«Qazirgi tańda epıdemıologıalyq jaǵdaıdyń nasharlaýyna baılanysty bas memlekettik sanıtarlyq dárigerdiń qaýlysy boıynsha barlyq qoǵamdyq is-sharalardy merekeleý shektelgen. Biz qalyptasqan jaǵdaıda azamattarymyzdyń qaýipsizdigi men densaýlyǵy birinshi orynǵa shyǵatynyn túsinýge tıispiz», - delingen úndeýde.
Komıtettiń resmı ókili osyǵan baılanysty barsha qazaqstandyqtardy jaǵdaıǵa túsinistikpen qarap, Qurban aıt qarsańynda shaǵyn otbasylyq sheńberde merekelik is-sharalar ótkizýge, barlyq baılanystardy azaıtýǵa, buqaralyq is-sharalardy, adamdar kóp jınalatyn rásimder uıymdastyrmaýǵa jáne ondaı sharalarǵa barmaýǵa keńes beredi.
Sonymen qatar, respýblıkanyń barlyq aımaqtarynda koronavırýstyń "delta" shtamy anyqtalǵanyn, onyń ádettegi shtamǵa qaraǵanda 60 paıyzǵa juqpaly jáne aýyr asqynýlarǵa ákelýi múmkin ekenin eske salady.
«Bıyl ekinshi jyl qatarynan qazaqstandyqtar qurbandyq shalý rásimin onlaın formatta jasaı alady. Ol úshin qurban2021.kz. saıtynda ótinim qaldyrý qajet. Epıdemıologıalyq jaǵdaıǵa baılanysty qurbandyq eti muqtajdar arasynda tolyǵymen taratylady. Sonymen qatar, karantındik talaptardy qatań saqtaýǵa, betperde kıýge, áleýmettik qashyqtyqty saqtaýǵa, qoldy jıi óńdeýge, adamdar kóp jınalatyn oryndarǵa barmaýǵa shaqyramyz», - deıdi Erjan Baıtanaev.