Tek árbir 4-shi qazaqstandyq (26,5%) sońǵy bir jylda keminde 1 kitap oqyǵanyn aıtty. Qalǵandary oqymaıdy, óıtkeni oqýǵa ýaqyttary joq (52%) nemese múlde oqýdy unatpaıdy (21,4%).
Bul statısıkamen keshe Májilis depýtaty Asqat Aımaǵambetov óziniń telegram áleýmettik jelisinde bólisti, dep habarlaıdy almaty-akshamy.kz. Derekterdi Qoǵamdyq saıasat ınstıtýty usynǵan. Zertteý 2023 jyldyń qarasha aıynyń sońy – jeltoqsan aıynyń ortasynda júrgizilipti. Saýalnamaǵa 18 jastan asqan 8 000 qazaqstandyq qatysqan. Saýalnama ulttyq reprezentatıvti irikteý arqyly júrgizilipti.
Ortasha alǵanda, respondentterdiń kitap oqýy sońǵy bir jylda 5 kitap (26,5%) oqıdy. Eń kóp kitap oqıtyn óńirler qataryna Shyǵys Qazaqstan (orta eseppen 10,6 kitap), Soltústik Qazaqstan (6,95) jáne Aqmola (6,34) oblystary kirgen. Al eń az kitap oqıtyn jurtshylyq Shymkent qalasynda (3,8 kitap), Ulytaý (3,7 kitap) jáne Jetisý (3,59) oblystarynda turady eken.
Bir qyzyǵy erlerge qaraǵanda áıelder kóbirek kitap oqıdy eken. Aýyl turǵyndarynpan góri qala turǵyndary kitapqa jaqyn ekendigi dáleldengen. Aǵa býyn ókilderi (61 jas jáne odan joǵary) jylyna orta eseppen 6,2 kitap oqıdy.
Bizge qaraǵanda sheteldikter kitap betterin kóbirek paraqtaıtyny baıqalǵan. Máselen, Fransıa men Kanada turǵyndary jylyna 17 kitap (bul Qazaqstannan orta eseppen 3,4 ese kóp), AQSH azamattary - 12 kitap (2,4 ese kóp), Ońtústik Koreıa eliniń adamdary - 11 kitap (2,2 ese kóp) oqıdy.
Eskererlik bir jaıt, ortalyqtyń málimetinshe, kitap óndirisiniń 90 paıyzy basqa elderde basylǵan. 2021 jyldyń derekteri boıynsha Reseıden kitap ımportynyń kólemi 14,7 mıllıon dollardy quraǵan.
Zertteýshilerdiń pikirinshe, oqý belsendiliginiń tómen bolýynyń taǵy bir sebebi – kitaptar men kitapshalardyń jalpy jáne ortasha taralymynyń tómendeýi. Shyqqan kitaptardyń 80 paıyzdan astamy oqýlyqtar men oqý-ádistemelik quraldar. Sonymen qatar, saýda núktelerindegi kitap ónimderi qunynyń qymbattyǵy áser etedi. Qazirgi kezde ústeme baǵa ártúrli baǵalaýlar boıynsha 60%-dan 100%-ǵa deıin jetedi.
Sońǵy bir jylda qansha kitap oqydyńyz?