Tazalaý jumystary «Birge - taza Qazaqstan» aksıasy barysynda júrgizildi.
Dúnıejúzilik qorshaǵan ortany qorǵaý kúnine oraı uıymdastyrylǵan «Birge - taza Qazaqstan» atty sharaǵa 150 myńnan astam adam qatysyp, 40 myń tonnaǵa jýyq qoqys jınaǵan, dep habarlaıdy Almaty-akshamy.kz Ekologıa, geologıa jáne tabıǵı resýrstar mınıstrliginiń baspasóz qyzmetine silteme jasap.
«Qazaqstan Respýblıkasy Ekologıa, geologıa jáne tabıǵı resýrstar mınıstrligimen uıymdastyrylǵan is-sharada elimizdiń búkil oblysynyń 150 myńnan astam turǵyndary qatysty. Olardyń arasynda kóptegen uıymdardyń, memlekettik organdardyń, qoǵamnyń ókilderi, sondaı-aq 25 myńnan joǵary ekobelsendiler men volonterler bar. Birlesken kúsh-jigermen respýblıkanyń 492 lokasıasy boıynsha 37 myń tonnadan astam qoqys jınaldy», – delingen mınıstrlik habarlamasynda.
Elordada aksıa ótkizýge arnalǵan birneshe alań anyqtaldy. Eń negizgileriniń biri Almaty aýdanyndaǵy Nura-Esil kanalynyń boıyndaǵy ýchaske boldy. Nur-Sultan qalasynyń bes myńǵa jýyq turǵyny qoqys tazalaýǵa shyǵyp, 540 tonna qoqysty óńdeýge jınady.
«Birge - taza Qazaqstan» aksıasy alǵash ret 2019 jyly bastaý aldy. Aksıanyń barlyq kezeńi ishinde oǵan elimizdiń 650 myńnan astam turǵyny qatysty. Tek úsh jyldyń ishinde 400 myń tonnadan astam qaldyq jınalyp, kádege jaratýǵa berildi. Sonymen qatar is-shara aıasynda eki mıllıon aǵash otyrǵyzyldy.
Ekologtardyń kásibı merekesi jazdyń alǵashqy kúnderinde tek Qazaqstanda ǵana emes, Reseıde de toılanýy sımvolıkalyq mánge ıe. Osyǵan baılanysty bıyl alǵash ret Nur-Sultan men Orynbor arasynda telekópir ótkizildi. Birlesken dıalogta osyndaı is-sharalardyń jaHandylyǵy men qajettiligi týraly pikir almasty. Kórshi memleket bizdiń ortaq sý qoımamyz bolyp tabylatyn Jaıyq ózeniniń jaǵasyn tazalaý boıynsha josparlarymen bólisti. Óz kezeginde Ekologıalyq retteý jáne baqylaý komıteti tóraǵasynyń orynbasary Ermek Ýmarov Reseı Federasıasyndaǵy barlyq qatysýshylar men áriptesterine planeta ekologıasynyń jaı-kúıin birlesip retteýdegi túsinispenshilikteri pen ashyqtyǵy úshin alǵysyn bildirdi.
Bundaı qarym-qatynas bolashaqta jaqsy dástúrge aınalýy múmkin ekenin atap ótken jón. Óıtkeni, osy sekildi aksıalardy ótkizýdiń basty jáne jalpy maqsaty jastardy ekologıalyq mádenıetke jáne qorshaǵan ortaǵa uqypty qaraýdaǵy kózqarastaryn tárbıeleý bolyp tabylady.
