«Listapad» - Belarýstegi kıno salasynyń eń iri festıválderiniń biri.
Bıyl festıvál 4-11 qarasha aralyǵynda ótti. Oǵan otandyq rejıser Dáýren Qamyshbaevtyń «Zere» tolyqmetrajdy kartınasy qatysty, dep habarlaıdy Almaty-akshamy.kz.
Sháken Aımanov atyndaǵy «Qazaqfılm» kınostýdıasy taratqan málimetke sensek, halyqaralyq Mınsk kınofestıvalinde úzdik dybystyq (mýzykalyq) sheshim úshin júlde qazaqstandyq kompozıtor Dana Zýlpyharǵa «Zere» fılmindegi jumysy úshin berildi.
Aıta keteıik, «Zere» fılmi «Qazaqfılm» kınostýdıasy, Qara Production, Libertus Film, cinema D jáne Jambyl oblystyq kıno ortalyǵynyń qoldaýymen túsirildi.
«Zere» - qazaqstandyqtarǵa jaqyn sújeti bar drama. Ol kúıeýiniń qaıǵyly qazasynan keıin qyzyn aýyldaǵy eń baı jáne yqpaldy adamǵa áıel retinde satpaq bolǵan kezde anasynyń erkine qarsy shyqqan bostandyqty súıetin qyz týraly. Biraq Zere tákappar Talap esimdi balyqshy jigitke ǵashyq bolyp, jasyryn úılený úshin onymen birge qashyp ketedi.
Kınokartınada basty rólderdi Adına Bajan, Sanýrjan Súleımenov, Murat Bısembın, Berik Aıtjanov, Olga Landına, Eljas Rahım jáne basqa da akterler somdady. Fılmniń túsirilimi Balqash kóliniń mańynda, Moıynqum qumdarynyń fonynda ornalasqan Taısoıǵan balyq aýlaý aralynda ótti.
Sondaı-aq qyrkúıek aıynyń sońynda Máskeýdegi «Kınoshok» festıvaliniń tolyqmetrajdy fılmder baıqaýynda qazaqstandyq «Zere» fılmi Úzdik mýzyka nomınasıasyn jeńip alǵan bolatyn.