Grekıanyń Gıdra aralynda 13 qazaqstandyq týrıs jalǵa alynǵan ıahtada otshashý jasap, saldarynan orman órti oryn aldy.
Oqıǵa 21 maýsym kúni keshke Agıos-Nıkolaos jaǵajaıynyń aımaǵynda bolǵan, dep habarlaıdy Almaty-akshamy.kz.
Derekterge súıensek, týrıser aldymen ıahtany jalǵa alyp, keıin onda otshashý uıymdastyryp, ony qurlyqqa qaraı ushyrǵan. Nátıjesinde qaraǵaıly ormanda órt shyqty.
Keıin olar órtti kórip, sóndirýge tyrysqan. Alaıda jalyn kúshti bolǵandyqtan órt sóndirý bólimine qońyraý shalyp, keıin ózderi oqıǵa ornynan ketip qalǵan.
Gıdra meri Djorgos Kýkýdakıstyń aıtýynsha qazir jalyndy sóndirýge órt sóndirýshiler men eriktiler qatysyp, aýadan sý shashatyn tikushaq jumyldyrylǵan
"Biz keıbir adamdardyń sonshalyqty jaýapsyz bolyp, otshashýdy qaraǵaıly ormanǵa qaraı shashqanyna ashýlymyz", — dedi ol.
Qala basshysy órtti uıymdastyrǵan sheteldikterdi sotqa berýge nıetti ekenin aıtty.
Kemede tutaný sátine qatysqandardyń barlyǵy, onyń ishinde ekıpaj músheleri de ustaldy. Olardan Výlagmenı mańyndaǵy jaǵalaý kúzetiniń ortalyǵynda jaýap alynbaq.
Gıdra – Gresıa týrızmniń negizgi ortalyqtarynyń biri. Tabıǵaty baı araldy qorǵaý maqsatynda munda tipti motorly kólik júrmeıdi.