Bul shara emosıonaldy stress deńgeıin tómendetedi.
Ústimizdegi jylǵy mektep túlekterine Ulttyq biryńǵaı testileýdi eki ret tapsyrýǵa ruqsat beriledi. Bul týraly olarǵa arnaıy hat jazǵan Bilim jáne ǵylym mınıstri Asqat Aımaǵambetov jetkizdi, dep habarlaıdy Almaty-akshamy.kz.
Mınıstr áleýmettik jelilerde jyl saıynǵy dástúr boıynsha túlekterge hat jazǵanyn jetkizdi. Bul qujatta mınıstr túlekterge sáttilik tilep, oqýshylardyń UBT-dan qıyndyqsyz ótýi úshin qosymsha qandaı sharalar qabyldanǵanyn jazǵan.
«Jaqsy jańalyq ta bar. Instagram-da meni belgilep, grantqa túsý úshin bir emes, eki ret UBT tapsyrý týraly ótinish jazyp júrgenderińizdi bilemin. Sheshim qabyldaý kezinde biz oqýshylardyń usynysyn, qyzyǵýshylyǵyn nazardan shyǵarmaýǵa tyrysamyz. Sol sebepti osy joly da sizderdiń usynystaryńyz boıynsha sheshim qabyldadyq. Iaǵnı endi sizder eki ret UBT tapsyryp, grantqa túsýge múmkindik alasyzdar. Bul shara emosıonaldy stress deńgeıin tómendetetinine senimimiz mol», - dep jazdy mınıstr Facebook paraqshasynda.
Sonymen qatar ol túlekterge Ulttyq biryńǵaı testileý synaǵynan súrinbeı ótýlerine tilektes ekenin jetkizdi.
«Bilimderińizdiń arqasynda joǵary nátıjege qol jetkizip, grantqa ıe bolyńyzdar! Barshańyzǵa sáttilik tileımin!» - dedi Asqat Aımaǵambetov.