Ol topyraq tósenishindegi korttarda jaqsy óner kórsetti.
Qazaqstandyq tenısshi Tımofeı Skatov ATP Challenger maýsymynyń qorytyndysy boıynsha jyl jańalyǵy retinde tanyldy, dep habarlaıdy Almaty-akshamy.kz.
Kásibı tenısshiler qaýymdastyǵy (ATP) T.Skatovty 2022 jyly chellendjer týrnırlerinde ózin eń jaqsy qyrynan kórsetken bes oıynshynyń qataryna qosty.
Atalǵan qaýymdastyqtyń resmı saıtynan málim etkenindeı, Parmada (Italıa) óziniń alǵashqy tıtýlyn jeńip alǵan 21 jastaǵy T.Skatov 2022 jyly ATP Challenger Tour jarystarynda chempıon atanǵan jalǵyz qazaqstandyq boldy. Álemniń 142-raketkasy fınalda osyǵan deıin toǵyz machta qatarynan jeńiske jetken slovakıalyq Iýzek Kovalıkti utty.
Tımofeı Skatov topyraq tósenishindegi korttarda jaqsy óner kórsetti. Bıyl ol Kokımbo, Lıssabon, Braga, Sevılá, Rozeto-delá-Abrýssı-2 jáne Parma chellendjer dodalarynda jartylaı fınalǵa deıin jetti. Qyrkúıek pen qazanda qazaqstandyq tenısshi 16 oıynnyń 14-inde jeńiske jetti. Al Coquimbo Challenger jarysynda dúnıejúzilik reıtıńte ózinen áldeqaıda joǵary turǵan, álemniń 71-raketkasy Federıko Korıany tize búktirdi.