Olar Grekıada baq synap jatyr.
Mamyr aıynyń 20-22-si kúnderi Grekıa astanasy – Afınada sý sportynan ártistik júzýden Álem kýbogynyń sýperfınaly ótedi. «Spıros Lýıs» sý sporty ortalyǵynda álem myqtylary sheberlik baıqasatyn úzdikter qatarynda Qazaqstan quramasynyń ókilderi de bar, dep habarlaıdy Almaty-akshamy.kz Egemen.kz silteme jasap.
Mádenıet jáne sport mınıstrligine qarasty Sportty damytý dıreksıasynyń málimeti boıynsha, Álem kýbogynda el namysyn Nargıza Bolatova, Aıgerim Qurmanǵalıeva, Karına Abdýlına, Ksenıa Makarova, Eterı Kakýtıa, Anna Pavlesova, Iýlıa Rogaleva, Valerıa Stolbýnova, Jaklın Iakımova, Jánıa Jıenǵazy, Arına Pýshkına, Iasmın Tuıaqova, Karına Magrýpova, Darına Valıýllına, Edýard Kım qorǵaıdy. Ulttyq quramanyń bas bapkeri – Álıa Karımova.
Aıta keteıik, FINA-nyń ártistik júzýden Álemdik serıasy 4 kezeńnen turady. Alǵashqy jarys 20 naýryzda AQSH pen Kanadada vırtýaldy túrde ótse, 2-kezeńniń jarystaryn Fransıa astanasy – Parıj qabyldady. Al 3-kezeń 7-8 mamyr kúnderi Aýstralıada vırtýaldy formatta ótti. Qazaqstan quramasy bul básekede eki júldege qol jetkizdi. Atap aıtqanda, qyzdar qurmasy komandalyq erkin baǵdarlamada Kanada (84,8000 bal) men Izraılden (83,9333 bal) keıin úshinshi orynǵa taban tirep, qola medal jeńip aldy. Quramanyń «Moana» anımasıalyq fılmi-niń jelisimen daıyndaǵan «Vaıana» baǵdarlamasyna tóreshiler 79,6000 upaı berdi. Al erkin kombınasıa sanatynda Qazaqstan sportshylary amerıkalyq kompozıtor Braıan Setserdiń «Malagená» týyndysyna bılep, kúmis medal oljalady (79,4667 upaı).
Álem kýbogynyń (4-kezeńniń) jalpy júlde qory – 257 000 AQSH dollaryn quraıdy. Afına tórinde júzgishter taǵy 310 myń dollardy sarapqa salady.
Grekıada ótetin básekeniń orny erekshe. Óıtkeni 17 maýsymda Majarstan astanasy – Býdapeshtte sý sporty túrlerinen XIX álem chempıonatynyń shymyldyǵy túriledi. Iaǵnı álem birinshiligine deıin iriktelgen eń úzdik atletter júzý, daıvıng, sý doby, ártistik júzý men ashyq aspan astynda sýda júzýden júldege talasady. FINA kúntizbesindegi osy sheshýshi jarysta sportshylar bar daıyndyǵyn pysyqtaı alady.