Nysana kózdeýden aralas komandalyq synda Qazaqstan komandasy Parıj Olımpıadasynda qola medal jeńip aldy. Bul el úshin úlken jetistik boldy, jáne elimizge eń alǵashqy medaldy Aleksandra Le men Islam Sátpaev syılady.
Olga Dovgýn óziniń qýanyshyn jasyrmaı, sportshylardyń medal alatynyna sengenin aıtty. Ol eki sportshynyń da álemdik deńgeıde júldege talasa alatyn qabiletterin kórip júrgenin, Azıa chempıonaty men álem kýbogi kezeńderinde ekeýiniń de jaqsy nátıje kórsetkenin atap ótti. Degenmen, buǵan deıin sáttilik jetispeı kelse, bul joly eń úlken jarys – Olımpıada oıyndarynda qola medalǵa qol jetkizgenderin erekshe atap ótti.
İrikteý kezeńinde ár komandaǵa 30 ret atý múmkindigi berilip, alǵashqy tórt komanda fınalǵa ótedi. Bizdiń sportshylar úshinshi orynmen ótti jáne qola medal jeńip aldy. Bul Qazaqstan úshin erekshe jetistik, óıtkeni 1996 jylǵy Atlanta Olımpıadasynan beri nysana kózdeýden medal bolmaǵan.
"Negizi, nysana kózdeýden Olımpıada oıyndarynda eń birinshi júlde oınatylady. Tek baǵdarlama aýysty demeseńiz, únemi Olımpıadada birinshi medaldi mergender sarapqa salady. Eń alǵashqy jarys kúninde Qazaqstanǵa eń alǵashqy medaldi syılaý – keremet sezim! Bul úlken baqyt," - dedi Dovgýn.
Qazaqstandyq sportshylar 10 metrge vıntovkamen nysana kózdeýden úzdik úshtikke endi jáne bul jetistik el sportynyń tarıhynda mańyzdy oryn alady.