Aldyn alý jumystaryna 17 943 volonter tartyldy.
16 qyrkúıekte qazaqstandyq qutqarýshylar shomylý maýsymynda jasaǵan jumysynyń qorytyndysyn shyǵardy, dep habarlaıdy Almaty-akshamy.kz.
«Adamdardyń sýdaǵy qaýipsizdigin qamtamasyz etý maqsatynda TJM barlyq deńgeıdegi ortalyq jáne jergilikti atqarýshy organdarmen ózara is-qımyl jasaı otyryp, sýda tótenshe jaǵdaılardyń týyndaý qaýpin azaıtý boıynsha uıymdastyrýshylyq jáne praktıkalyq is-sharalar keshenin aldyn ala bastady jáne úzdiksiz ótkizildi», – delingen Tótenshe jaǵdaılar mınıstrliginiń baspasóz qyzmetiniń habarlamasynda.
TJM kúshteri İİM-men, jergilikti atqarýshy organdarmen jáne volonterlermen birlesip 76 649 reıd jáne patrúldeý júrgizdi, ÁQBK-niń 440-baby «qoǵamdyq oryndarda bolý qaǵıdalaryn buzý» boıynsha 4 788 adam ákimshilik jaýapkershilikke tartyldy, sondaı-aq ÁQBK-niń 364-baby boıynsha («ortaq sý paıdalaný qaǵıdalaryn buzý») 5 781 adamǵa eskertý jasaldy jáne 172 adamǵa aıyppul salyndy.
Mamandardyń aıtýynsha, bıyl sý aıdyndarynda adam óliminiń aldyn alýdyń jańa ádisteri qoldanyldy. Avıasıalyq jáne temirjol kóliginiń mýltımedıalyq jabdyqtary sý aıdyndaryndaǵy qaýipsizdik erejelerin saqtaý boıynsha úgit-nasıhat ónimderin taratý úshin paıdalanyldy.
«2GIS» kartografıalyq platformasynda elimizdiń barlyq óńirlerinde sý aıdyndarynda shomylýǵa tyıym salynǵan jáne ruqsat etilgen oryndardyń derekteri ornalastyrylǵan.
Adamdardyń qaýipsiz júris-turys mádenıetin qalyptastyrý maqsatynda qýshylarmen 1 129 ınteraktıvti sabaq jáne halyqpen 5 507 jıyn ótkizildi.
«TJM jáne memlekettik organdar qabyldap jatqan sharalarǵa qaramastan, shomylý maýsymy kezeńinde sý aıdyndarynda qarapaıym qaýipsizdik erejelerin saqtamaǵandyqtan 319 adam, onyń ishinde 95 kámeletke tolmaǵandar sýǵa ketti.Sý aıdyndarynda balalardyń qaza bolý jaǵdaılarynyń 82%-ynda balalar ata-analarynyń qaraýynsyz boldy», – delingen mınıstrlik habarlamasynda.
Sýǵa shomylý maýsymynyń aıaqtalýyna qaramastan, qutqarýshylar sý aıdyndarynda adamdardyń óliminiń aldyn alý boıynsha profılaktıkalyq jumysty jalǵastyrýda. Óıtkeni kúzgi kezeńniń bastalýymen ań aýlaý jáne balyq aýlaý maýsymy bastalady.
TJM sýdaǵy qaýipsizdik qaǵıdalaryn saqtaýǵa keńes beredi.