"QazAvtoJol" ulttyq kompanıasy Qazaqstanda aýa raıy kúrt ózgerip jatqanyn eske saldy. Birqatar óńirlerde alǵashqy qar túsip, kóktaıǵaq bolatynyn eskertti, dep habarlaıdy Aqshamnews.kz tilshisi kompanıa deregine silteme jasap. Osyǵan baılanysty júrgizýshilerge kólikterin qysqy maýsymǵa aldyn ala daıyndaý usynyldy.
Kompanıa mamandarynyń aıtýynsha:
"Joldarda kóktaıǵaq bastalady, al tejelý qashyqtyǵy birneshe ese artady. Ózińizdiń jáne aınalańyzdaǵy adamdardyń qaýipsizdigin oılańyz", - delingen eskertýde.
"QazAvtoJol" júrgizýshilerge mynadaı keńes beredi:
- Kólikti qysqy dóńgelekterge aýystyrý joldaǵy taıǵaqtan tejeıdi.
- Tejeý júıesin, akýmýlátordy jáne jaryq quraldarynyń durystyǵyn tekserý.
- Qysqy otyn paıdalanýǵa jáne antıfrız deńgeıin baqylaýǵa kóńil bólý.
- Jyldamdyq rejımin jáne qaýipsiz araqashyqtyqty saqtaý, kúrt manevrlerden aýlaq bolý.
"Esińizde bolsyn, aýa raıyn eskermese, tájirıbeli júrgizýshiniń ózi qıyn jaǵdaıǵa tap bolýy múmkin. Óz-ózińizdi jáne jaqyndaryńyzdy qorǵańyz. Alda qys, bári sizdiń uqyptylyǵyńyz ben jaýapkershiligińizge baılanysty", - dep atap ótti kompanıa.
Sonymen qatar, jol qyzmetteri táýlik boıy qozǵalys qaýipsizdigin qamtamasyz etýdi jalǵastyryp jatqany habarlandy. Suraqtar týyndaǵan jaǵdaıda júrgizýshiler 1403 qysqa nómirindegi jedel jelige habarlasa alady.