Ankarada 16-shy kitap kórmesi ótýde
Bul sharada qazaqstandyq jazýshylardyń shyǵarmalary kópshilik nazaryna usynyldy, dep habarlaıdy Almaty-akshamy.kz.
Shara barysynda Jambyl Jabaevtyń «Kóroǵly» dastanynyń, Nurǵalı Orazdyń «Qazyǵurt oqıǵalary» kitabynyń, Baýyrjan Qaraǵyzuly týyndysynyń túrik tilindegi aýdarmalary tanystyryldy.
«Jambyl atamyzdyń «Kóroǵly» degen dastany – búkil túrki jurtyna taptyrmaıtyn qundylyq. Bul da alǵash ret túrik tiline aýdarylyp otyr. Sondyqtan Ankara qalasynda ótip jatqan atalmysh kórmege bizdiń qatysýymyz, ǵalymdarymyzdyń kitaptarynyń tanystyrylymy elimizdiń táýelsizdik jyldarynda atqarǵan úlken jetistigi dep bilemiz», - deıdi jazýshy Málik Otarbaev.
«Biz úshin kitap kórmesi – rýhanı mereke. Túrik qalamgerlerimen biraz jyldan beri jaqyn aralasyp turamyz. Olardyń shyǵarmalaryn biz, bizdiń shyǵarmalardy olar tárjimalap oqyrmandaryna, eline tanystyryp jatyr. Qazaqstan táýelsizdiginiń 30 jyldyǵyna oraı meniń «Qazyǵurt oqıǵalary» dep atalatyn kitabym túrikshe basylyp shyqty», - deıdi jazýshy Nurǵalı Oraz.
Jalpy, kitap kórmesinde 350 jazýshy, 200-ge jýyq baspa úıi bas qosqan jármeńkede 100 myń dana kitap tanystyrylmaq. Óz kezeginde Túrkıa parlamentiniń spıkeriniń aıtýynsha, mádenı sharalar eki el yntymaqtastyǵyna eleýli úles qosady.
«Jármeńkege baýyrlas qazaq eliniń jazýshylary qatysyp jatqany úlken mártebe. Kez kelgen qaladaǵy kitap jármeńkesi mańyzdy. Degenmen Ankara kitap kórmesiniń orny bólek. Shaharda 22 ýnıversıtet pen 300 myńnan astam stýdent bilim alady. Demek, jas oqyrmandar kóp degen sóz», - dedi Túrkıa parlamentiniń spıkeri Mustafa Shentop.