Qazaqstandyq jas tenısshiler ITF jáne Tennis Europe serıasy boıynsha ótken týrnırlerdiń jeńimpazy atandy, dep habarlaıdy Almaty-akshamy.kz Inform.kz-ke silteme jasap.
Qazaqstan tenıs federasıasynan málim etkendeı, Sholpan-Atada (Qyrǵyzstan) 18 jasqa deıingiler arasynda tórtinshi sanattaǵy ITF jarysynda Erasyl Erdilda úzdik shyqty.
Erasyl jekeleı syn fınalynda ırandyq Kasr Rahmanıdi utty. Esep 3:0 bolyp, qazaqstandyq tenısshi jeńip jatqan sátte Rahmanı machty jalǵastyrýdan bas tartty.
Juptyq synda qyzdar arasynda Ádemi Amankeldi qyrǵyzstandyq Vladıslava Andreevskaıamen birge fınalda reseılikter Krıstına Belkova - Ksenıa Krýpenınany utty – 6:4, 6:2.
Robert Kamınskıı óz jankúıerlerin qýantyp keledi. Ol Germanıanyń Koblens qalasynda 12 jasqa deıingiler arasynda birinshi sanattaǵy Tennis Europe dodasynda kezekti tıtýlyn jeńip aldy. Robert fınalda Iran eliniń jas juldyzy Kırash Sadıjzadeni tize búktirdi – 6:3, 6:2. Osylaısha, almatylyq túlek sońǵy eki aptada ekinshi jeńisine qol jetkizdi.
Koblenste taǵy bir qazaqstandyq Tursaıd Dárken juptyq synda fınalıst atandy. Zara Dárkenniń kishi inisi ırandyq K. Sadıjzademen birge sońǵy básekede germanıalyqtar Lıan Bınert - Maks Gombekke ese jiberdi – 3:6, 6:4, 1:10.
Chernogorıada ekinshi sanattaǵy osyndaı týrnırde 11 jasar Iasmın Dúısembaeva jartylaı fınalǵa deıin jetip, rýmynıalyq Iasın Stroege jol berdi – 6:3, 3:6, 8:10.
Qazaqstandyq jasóspirimder, sondaı-aq AQSH ashyq chempıonatyna daıyndyǵyn tıanaqtaý ústinde. Bıyl jasóspirimder arasynda AQSH ashyq chempıonatynyń irikteý saıystarynda Maksım Batútenko, Arýjan Saǵyndyqova jáne Sandýǵash Kenjebaeva el namysyn qorǵaıdy.
Vashıngton qalasynda birinshi sanattaǵy ITF Juniors jarysynda Dana Baıdáýlet tarıhı tabysqa qol jetkizdi. Ekinshi aınalymda Dana óz jasyndaǵylar arasynda dúnıejúzilik reıtıńide 37-orynda turǵan japonıalyq Saıakı Ishımen Amerıka jasóspirimder dodalarynyń tarıhynda eń uzaq machty ótkizdi. D. Baıdáýlet 4 saǵat 52 mınýtqa sozylǵan kezdesýde qarsylasyn 7:6 (7:3) 6:7 (5:7) 7:6 (7:4) esebimen jeńdi.