Almatydaǵy kardıologıa jáne ishki aýrýlar Ulttyq ǵylymı ortalyǵy Joint Commission International (JCI) akredıtasıasynan sátti óte otyryp, medısınalyq kómektiń qaýipsizdigi jáne sapasynyń halyqaralyq standarttarǵa sáıkestigin rastady.
Instıtýt osyndaı deńgeıge qol jetkizgen Qazaqstandaǵy úsh klınıkanyń birine aınaldy, dep habarlaıdy aqshamnews.kz Densaýlyq saqtaý mınıstrligine silteme jasap.
Bir apta ishinde JCI sarapshylary klınıka jumysyn 1110 krıterıı boıynsha baǵalaı otyryp, jan-jaqty aýdıt júrgizdi. Joǵary táýekeldegi dári-dármektermen jumys isteýge jáne aýrýhanaishilik ınfeksıalardyń aldyn alýǵa, naýqastardy emdeý men kútý ádisterine, medısınalyq úderisterdiń qaýipsizdigine, táýekeldi basqarý men naýqastar quqyǵynyń saqtalýyna erekshe nazar aýdaryldy.
Aýdıtorlar klınıkanyń medısına personalynyń biliktiligi joǵary ekenin, ınstıtýttyń barlyq úderisteri naýqastar turǵysynan baǵalanǵanyn atap ótti.
Aýdıt nátıjesinde JCI komandasy JCI halyqaralyq kitaphanasyna engizýge usynylǵan, ǴZI-da qoldanylatyn birneshe biregeı tájirıbeni bólip kórsetti. Onyń ishinde qant dıabetine shaldyqqan júkti áıelderdi baǵdarlaýdyń ozyq ádisteri, kardıoreabılıtasıadaǵy sabaqtastyq talaptary men ishekti endoskopıaǵa daıyndaý standarttary bar.
Osy tájirıbelerdi óziniń halyqaralyq kitaphanasyna engizý týraly JCI usynymdary atalǵan ınstıtýt tájirıbesi álem boıynsha medısınalyq uıymdarǵa da taratyp, qoldanýǵa bolatynyn bildiredi.
ǴZI kardıologıasy sapasyn basqarýdyń júıeli ádisi men jańa tájirıbesin engizýdiń arqasynda klınıkalyq kórsetkishterdi aıtarlyqtaı jaqsartyp, naýqastardyń qyzmetterge qanaǵattanýshylyǵyn arttyrý jáne ólim-jitimdi azaıtý múmkin boldy.