Ónimniń alǵashqy partıasy shaǵyn zaýytta shyǵaryldy.
Qazaqstannyń ǵalymdary sportshylarǵa arnalǵan biregeı qospany shyǵardy, dep habarlaıdy aqshamnews.kz Qazaqstan ǵylym jáne joǵary bilim mınıstrligine silteme jasap.
Jańa taǵamdyq qospa sportshylarǵa ǵana emes, zıandy jáne erekshe zıandy eńbek jaǵdaıynda jumys isteıtin adamdarǵa arnalǵan.
Qospanyń basty ereksheligi sol, ol jasýshalardy zaqymdanýdan qorǵaı otyryp, totyǵý stressimen kúresýge kómektesedi. Sondaı-aq, jasqa baılanysty shyǵatyn aýrýlardy báseńdetýge jáne qorshaǵan ortanyń jaǵymsyz áserlerimen kúresýge, adamnyń fızıkalyq jáne psıhıkalyq ónimdiligin arttyrýǵa yqpal etedi.
"Barlyq ónim Qazaq taǵamtaný akademıasynda mindetti saraptamadan ótip, arnaıy dıetalyq ónim retinde tirkeldi. Joba boıynsha jumys ázirleý, testileý jáne sertıfıkattaý kezeńderin qosa alǵanda úsh jylǵa jýyq ýaqytty aldy", - deıdi joba jetekshisi Serǵazy Shyńǵys.
"Hormesis Oxy" jalpy ataýymen úsh ónim (kásibı sportshylarǵa, eresek jastaǵy adamdarǵa jáne sportpen turaqty emes aınalysatyndarǵa arnalǵan) serıasy ázirlendi. Bolashaqta halyqaralyq naryqqa shyǵý arqyly óndiris pen ónim túrlerin keńeıtý josparlanyp otyr.
"Ónimderde polıfenoldardyń biregeı qospasy – negizinen ósimdik tektes bıologıalyq belsendi qosylystar, gel túzýshi agentter, sondaı-aq adaptagender men aktoprotektorlardyń shóp syǵyndylary bar. Biz táttilendirgishter men kalorıalyq toltyrǵyshtardy almastyratyn prebıotıkalyq jáne dıetalyq talshyq bolyp tabylatyn polıdekstrozany qoldanamyz. Sondyqtan qant dıabetimen aýyratyn adamdar da paıdalana alady", - dep atap kórsetti ǵalym.