Bul týraly Qazaqstannyń syrtqy ister mınıstrligi habarlady.
Qyrǵyzstanda bolǵan joıqyn selden qaza tapqandar ishinde qazaqstandyq eki bala bar, dep habarlaıdy Almaty-akshamy.kz Qazaqstannyń syrtqy ister mınıstrligine silteme jasap.
Mınıstrliktiń habarlaýynsha, taǵy eki bala joǵalyp ketken.
"28 maýsymda Qyrǵyzstanda nóser jaýyn-shashyn bolýyna baılanysty Osh oblysynyń Nooqat aýdanynda joıqyn sel júrip, saldarynan turǵyndar men týrıser zardap shekti. Qyrǵyzstannyń tótenshe jaǵdaı mınıstrliginiń aldyn ala bergen aqparaty boıynsha, qaza tapqandardyń arasynda Qazaqstannyń kámeletke tolmaǵan azamattary bar. Qazirgi tańda eki balanyń denesi tabylyp, taǵy ekeýin izdeý jumystary jalǵasyp jatyr", - delingen habarlamada.
Vedomstvo atap ótkendeı, tabıǵı apat ornynda qyrǵyz tarapynyń qutqarý qyzmetteri jumys istep jatyr.
"Qazaqstandyq dıplomattar jergilikti bılikpen turaqty baılanysta. Bizdiń Qyrǵyzstandaǵy Elshiligimiz qaıtys bolǵan balalardyń týystaryna barlyq qajetti kómek kórsetip jatyr. Bul qaıǵyly oqıǵa syrtqy ister mınıstrliginiń erekshe baqylaýynda", - dep atap ótti mınıstrlik.
Osyǵan baılanysty Qazaqstan syrtqy ister mınıstri Murat Nurtileý Qyrǵyzstan SİM basshysy Jeenbek Kýlýbaevpen telefon arqyly sóılesip, tótenshe jaǵdaıdyń mán-jaıyn jáne eki eldiń tıisti memlekettik organdarynyń ózara is-qımylyn talqylady.
Qyrǵyzstannyń Osh oblysynyń Nooqat aýdanynda joıqyn sel bolyp, jeti adam qaza tapqan.