Almatydaǵy №7 Qalalyq klınıkalyq aýrýhananyń ortoped mamandary 60 jastaǵy áıelge asa kúrdeli ota jasady. Qımyl-tirek júıesindegi dert saldarynan aýyr keselge dýshar bolǵan naýqastyń úzilgen býyny durys bitpeı, asyq jilik shybyǵy jansyzdanyp, sal bola bastaǵan degen dıagnoz qoıylǵan bolatyn, dep habarlaıdy almaty-akshamy.kz.
Ota Germanıanyń Gessen jáne Marbýrg ýnıversıtettik klınıkasynyń profesory Reıner Shnettlerdiń qatysýymen ótken sheberlik klasy barysynda jasaldy. №7 aýrýhananyń travmatologıa jáne ortopedıa bólimshelerinde alǵash ret revızıondyq protezder ornatyldy. Jańa tehnologıany álemde tájirıbege profesor Shnettler áriptesterimen birge qoldanysqa engizgen.
Tize býynyn revızıalyq endoprotezdeý – bul endoprotez bólikterin aýystyrýǵa arnalǵan ota. Operasıa kezinde protezdiń turaqsyz, zaqymdalǵan nemese ózgeriske ushyraǵan bólikteri alyp tastalyp, ornyna jańasy ornatylady. Endoprotez tize býynynyń zaqymdaný deńgeıine, býyndardyń jaǵdaıyna jáne basqa faktorlarǵa qaraı tańdalady.
Sátti jasalǵan ota nátıjesinde naýqas qalypty ómirge oralyp, aýyrsynýdan arylyp, óz betinshe júrip-turatyn boldy. Buryn mundaı pasıentter múgedektik arbasyna tańylatyn bolsa, qazirgi zamanaýı ımplanttardyń ozyq tehnologıalary arqasynda olardy aıaqqa turǵyzýǵa múmkindik týyp otyr.
«Tize pishini buzylyp, 4-dárejeli artrozben aýyratyn naýqas bir jyl buryn ózi turatyn óńirde tize býynyna ota jasatqan. Aıaqqa endoprotez ornatylǵan, biraq 3-4 aıdan keıin aýyr jaraqat alyp, jambas súıegi synyp, tizeniń qaptalyndaǵy býyn úzilgen. Saldarynan protez ornynan qozǵalyp ketip, qatty aýyrsyný sezimi paıda boldy. Naýqas birneshe emdeý mekemesiniń tabaldyryǵyn tozdyryp, aqyrynda jetinshi aýrýhanany tańdady. Pasıentke jańa zamanaýı endoprotez ornatý týraly usynys jasadyq. Bul jerde súıek qurylymynyń jetispeýshiligi, býyn apparatynyń zaqymdanýy sıaqty aýyr dıagnozdar bar. Mundaı jaǵdaıda kádimgi protezder jaramsyz», – deıdi aýrýhananyń ortohırýrgıa bólimshesi meńgerýshisi Arnat Baızaqov.
«Klınıka óte kúrdeli jaǵdaı. Qaıta jasalǵan operasıa birinshige qaraǵanda áldeqaıda kúrdeli sanalady. Biraq biz áriptestermen birlese otyryp, oıdaǵy nátıjege qol jetkizdik. Inovasıalyq DX júıesin qoldana otyryp, pasıenttiń sol jaq tize býynyn almastyrdyq. Ota 1,5 saǵatqa sozyldy, naýqas kóp qan joǵaltqan joq (shamamen 200-250 ml). Pasıent Shyǵys Qazaqstan oblysynyń turǵyny. Bizge portal arqyly jatqyzyldy, joǵary tehnologıaly kómek MÁMS qarajaty esebinen kórsetildi», – dep atap ótti Arnat Baızaqov.
Dárigerdiń aıtýynsha, naýqas qazir belsendi qımyl-qozǵalys pen erte reabılıtasıaǵa daıyndalyp jatyr. Ońaltý sharalary bólimshe ishinde ótedi.
Tájirıbeli dárigerlerdiń biliktiliginiń, ınovasıalyq tehnologıalar men aýrýhanadaǵy qondyrǵylardyń arqasynda ota sátti ótip, naýqas qalypty ómirge qaıta múmkindik aldy.