Mamandar beıimdelgen naryqtyq saqtandyrý modelin qoldaný usynylatynyn aıtty.
Bul týraly QR Densaýlyq saqtaý mınıstri Ajar Ǵınıat medısına qyzmetkerleriniń kásiptik jaýapkershiligin saqtandyrýdyń ońtaıly tetigi retinde shetel tájirıbesi pysyqtalǵanyn aıtty, dep habarlaıdy Almaty-akshamy.kz QazAqparatqa silteme jasap.
«Mınıstrlik medısına qyzmetkerleriniń kásiptik jaýapkershiligin saqtandyrýdyń túrli modelderine taldaý júrgizdi. Halyqaralyq tájirıbede medısına qyzmetkerlerin qorǵaý úshin qorlar men qaýymdastyqtar (Shvesıa, Kanada, Danıa) qurý, sondaı-aq jeke naryqtar (AQSH, Germanıa, Japonıa, Túrkıa) arqyly kásiptik jaýapkershilikti mindetti saqtandyrý júıesi qoldanylady», - dedi Ajar Ǵınıat Májiliste «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde.
Onyń aıtýynsha, joǵaryda aıtylǵan halyqaralyq tájirıbeniń negizinde medısına qyzmetkerleriniń kásiptik jaýapkershiligin saqtandyrýdyń ońtaıly tetigi retinde Shvesıa, Kanada, AQSH, Japonıa jáne Túrkıa modelderi boıynsha beıimdelgen naryqtyq saqtandyrý modelin qoldaný usynylady.
Sonymen qatar ol 2017 jyly mınıstrlik Memleket basshysynyń tapsyrmasy boıynsha Derbes kepildik berý qoryn qurý aıasynda yntymaqtastyq qaǵıdaty boıynsha saqtandyrýdyń áleýmettik modelin usynǵanyn eske saldy (jarna mólsherin medısınalyq uıym - 50%, medısına qyzmetkeri - 50% dep bólý). Alaıda zań jobasy qoldaý tappaı, qabyldanǵan joq.
«Halyqaralyq tájirıbeni taldaýdyń negizinde, sondaı-aq jurtshylyqtyń, memlekettik organdardyń jáne saqtandyrý kompanıalarynyń qatysýymen júrgizilgen talqylaýlardyń qorytyndysy boıynsha jumys istep turǵan saqtandyrý kompanıalary arqyly medısına qyzmetkerleri kásiptik jaýapkershiliginiń júktelgen saqtandyrý modeli qabyldandy. Jumys berýshi - medısınalyq uıym saqtanýshy bolady. Al medısına qyzmetkerlerin lısenzıalaýdy engizý bolashaqta medısına qyzmetkerleriniń kásiptik jaýapkershiligin saqtandyrý júıesine qatysýshylardyń jaýapkershiligin bólýge múmkindik beredi», - dedi vedomstvo basshysy.
Onyń sózine qaraǵanda, osy modelge sáıkes, shaǵymdy qaraýdy medısınalyq uıym medıasıa elementterin qoldanyp, sondaı-aq beıindi medısınalyq qaýymdastyqtardy tarta otyryp, ishki aýdıt qyzmetiniń deńgeıinde júzege asyratyn bolady. Bul kezeńde másele medısınalyq uıymnyń ózinde rettelýi múmkin.
«Pasıent qyzmettiń sheshimimen kelispegen jaǵdaıda, shaǵym saraptamalyq qorytyndy berý úshin Medısınalyq jáne farmasevtıkalyq baqylaý komıtetiniń aýmaqtyq bólimshesine tapsyrylatyn bolady. Oń nátıje shyǵarylǵan jaǵdaıda, shaǵym boıynsha materıaldar, onyń ishinde sot-medısınalyq saraptamanyń qorytyndysy medısınalyq uıym saqtandyrylǵan saqtandyrý kompanıasyna beriletin bolady», - dedi Ajar Ǵınıat.
«Pasıentke keltirilgen zıan úshin ótemaqy tóleýdi Densaýlyq saqtaý mınıstrligi aıqyndaǵan jaǵdaılar boıynsha saqtandyrý kompanıasy júrgizedi. Tólemnen bas tartqan jáne sheshimmen qanaǵattanbaǵan jaǵdaıda pasıent sotqa júginýge quqyly. Sotqa júgingen kezde, tólem júrgizilmeıdi», - dedi mınıstr.