Qyzdyń operasıadan keıingi jaǵdaıy qanaǵattanarlyq.
Qyzylorda oblysynda «Asqazannyń trıhobezoary» dıagnozy qoıylǵan kishkentaı qyzǵa ota jasaldy. Hırýrgtar balanyń asqazanynan salmaǵy 1 keli, al uzyndyǵy 34 santımetr bolatyn shashty alyp tastady, dep habarlaıdy Almaty-akshamy.kz Turkystan.kz silteme jasap.
Oblystyq kópbeıindi balalar aýrýhanasynyń shuǵyl hırýrgıa bóliminiń meńgerýshisi Álimjan Tólegenovtiń aıtýynsha, naýqas tábetiniń tómendeýine, ishtiń aýyrýyna jáne júreginiń aınýyna shaǵymdanǵan.
«Tekserý kezinde biz balaqaıdyń ishinen isik tárizdi túzilýdi anyqtadyq. Sóıtip, oǵan «Asqazannyń alyp trıhobezoary» degen dıagnoz qoıyldy. Birden dereý ota jasaý týraly sheshim qabyldandy», – dedi Álimjan Tólegenov.
Hırýrg túsindirgendeı, trıhobezoar – asqazandaǵy bógde zat. Ol qurylymy tyǵyz bir zatqa jabysyp qalǵan shashtardan turady. Kishkentaı balalardyń kez kelgen zatty jutyp qoıatyny belgili. Ýaqyt óte kele, ol asqazandy toltyrady. Saldarynan naýqas tamaq ishe almaı qalady, tábeti de bolmaıdy.
«Bizdiń boljamymyz boıynsha, bala bir jastan bastap jerdegi shashtar men túrli qylshyqtardy jeı bastaǵan. Qyzdyń operasıadan keıingi jaǵdaıy qanaǵattanarlyq. Ol kem degende taǵy 10 kún dárigerlerdiń kútiminde bolady», – dedi hırýrg.
