Elordalyq áskerı avıabazada BUU mısıasy aıasynda (UNDOF) Golan jotalarynda qyzmet atqaryp, bir jyldan keıin elge oralǵan Qazaqstannyń tuńǵysh bitimgerlik kontıngentin saltanatty qarsy alý rásimi ótti.
Qurmet qaraýyl rotasynyń súıemeldeýimen bitimgerlik qyzmet atqarǵan áskerı qyzmetshilerdi Qorǵanys mınıstrliginiń basshylyǵy, Qarýly kúshterdiń ardagerleri men áriptesteri qarsy aldy, dep habarlaıdy aqshamnews.kz.
Qorǵanys mınıstri general-polkovnık Rýslan Jaqsylyqov ár bitimgerdiń qolyn alyp, jeke quramǵa alǵysyn bildirdi. Ol sondaı-aq, Qazaqstan armıasynyń tarıhynda alǵash ret Golan jotalarynda "BUU-nyń bólinýdi baqylaý jónindegi kúshteri" mısıasynda óziniń qarý-jaraǵy men tehnıkasymen derbes ulttyq kontıngent ornalastyrylǵanyn atap ótti.
- Bul mısıa alasapyran aımaqta halyqaralyq beıbitshilik pen turaqtylyqty saqtaý jónindegi mańyzdy mindet boldy. Sizderdiń kúsh-jigerlerińiz nazardan tys qalmaı, halyqaralyq arenada Qazaqstannyń bedelin jaýapty, ári beıbit memleket retinde odan ári nyǵaıtýǵa negiz boldy. Adal qyzmetterińiz ben jaýyngerlik tapsyrmany oryndaýdaǵy jaýapkershilikterińiz, sondaı-aq, qazirgi tańda basynan qıyn kezeńdi ótkerip jatqan adamdarǵa kómek qolyn sozǵandaryńyz úshin alǵys aıtamyn, – dep atap ótti qorǵanys vedomstvosynyń basshysy.
Bitimgerlik rotasynyń komandıri podpolkovnık Jiger Aıpov Faýar bazasynda mısıany oryndaý barysynda qazaqstandyq kontıngent 600-den astam tapsyrmany oryndaǵanyn atap ótti.
- Osydan bir jyl buryn bizdiń 139 adamnan turatyn alǵashqy bitimgerlik kontıngentimiz Golan jotalaryna attandy. Jaýapkershilik aımaǵynda rotanyń jeke quramy júkterdi alyp júrý boıynsha patrúldik jáne gýmanıtarlyq qyzmet atqardy. Biz 4 evakýasıa jasadyq jáne 400-den astam jarylmaǵan zattardyń joıdyq, - dedi ol.
Qıyn-qystaý kezeńde er adamdarmen birge BUU-nyń Golan jotalaryndaǵy mısıasynda 7 áıel áskerı qyzmetshi qyzmet atqardy.
Alǵa qoıylǵan mindetterdi oıdaǵydaı oryndaǵany úshin qazaqstandyq bitimgerilik kontıngenttiń jeke quramy BUU Mısıasy men Hatshylyǵy basshylyǵynyń joǵary baǵasyna ıe boldy.