QS WUR halyqaralyq akademıalyq reıtıńine engen qazaqstandyq joǵary oqý oryndarynyń sany rekordtyq deńgeıdi kórsetti
QS WUR álemdegi eń bedeldi reıtıńterdiń biri bolyp tabylady. Sondaı-aq bıyl keıbir ýnıversıtetter reıtıńte birneshe orynǵa kóterilip, óz pozısıalaryn nyǵaıta tústi, dep habarlady Almaty-akshamy.kz. QR Bilim jáne ǵylym mınıstrligine silteme jasap.
Ál-Farabı atyndaǵy Qazaq ulttyq ýnıversıteti kezekti ret 175-orynǵa turaqtap, álemniń 200 úzdik ýnıversıtetiniń qataryna endi. L.N. Gýmılev atyndaǵy Eýrazıa ulttyq ýnıversıteti 90 pozısıaǵa kóterilip 328-oryndy, al Muhtar Áýezov atyndaǵy Ońtústik Qazaqstan ýnıversıteti 482-oryndy ıelenip, úzdik 500 oqý ornynyń qatarynan kórindi. Sonymen qatar reıtıńke Satbayev University, Qazaq ulttyq agrarlyq zertteý ýnıversıteti, Abaı atyndaǵy Qazaq ulttyq pedagogıkalyq ýnıversıteti, S.J. Asfendıarov atyndaǵy Qazaq ulttyq medısına ýnıversıteti kirdi.
«Reıtıń tarıhyna kóz júgirtsek, bıyl onyń quramyna qazaqstandyq joǵary oqý oryndarynyń rekordtyq sany kirdi. Reıtıńke engizilgen 14 joǵary oqý ornynyń jeteýi sońǵy jyly óz pozısıalaryn jaqsarta tústi. Bul qazaqstandyq joǵary bilimniń halyqaralyq deńgeıdegi tanymaldylyǵynyń arta túskendigin kórsetedi», – dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Joǵary oqý oryndarynyń pozısıalaryn esepteý kezinde reıtıńte akademıalyq toptar men jumys berýshi uıym ókilderinen jınalǵan saýalnamalardyń nátıjeleri, sondaı-aq 2015 jyldan bastap 2019 jylǵa deıingi kezeńdegi 14,7 mıllıon jarıalanym eskerilgenin atap ótken jón. Álemdik reıtıńterde ilgerileý – qazaqstandyq bilim berý sapasynyń odan ári jaqsara túsýiniń jáne ýnıversıtetterdiń joǵary mártebesiniń aıqyn dáleli bolyp tabylady.