DSM baspasóz qyzmetiniń málimetinshe, Qazaqstanda 4300-den astam adam aǵza transplantasıasyn kútip otyr, dep habarlaıdy aqshamnews.kz
Jaqyn arada balalarǵa júrek pen baýyr transplantasıasyn júrgizý, sondaı-aq aǵza keshenderin transplantattaý josparlanǵan. Astanadaǵy Ulttyq ǵylymı onkologıa ortalyǵynda Aǵza donorlyǵy men transplantasıasynyń Eýropalyq kúnine oraılastyrylǵan «Úmit syılaǵan sheshim» forýmy ótti.
— Transplantologıany damytý — densaýlyq saqtaý salasyndaǵy memlekettik saıasattyń strategıalyq baǵyty. Búgingi kúni transplantasıa kóptegen jaǵdaılarda aýyr sozylmaly aýrýlardy emdeýdiń jalǵyz tıimdi ádisi bolyp qala berýde jáne pasıentterge tolyqqandy ómir súrýge múmkindik beredi. Biraq eń mańyzdysy — qaıtys bolǵannan keıingi donorlyq júıesine qoǵamnyń senimin qalyptastyrý, — dep atap ótti Densaýlyq saqtaý mınıstri Aqmaral Álnazarova.
Búginde Qazaqstanda 4300-den astam adam, onyń ishinde 121 bala aǵza transplantasıasyn kútip otyr. Árbir donor jeti adamnyń ómirin saqtaı alady, sondyqtan donorlyq mádenıetti damytý qoǵam úshin mańyzdy mindetke aınalady.
2012 jyly elimizde alǵashqy júrek transplantasıasy jasalǵannan beri qazaqstandyq dárigerler baýyr, búırek, júrek, móldir qabyq, al 2015 jyldan bastap ókpe transplantasıasyn da meńgerdi.
— Jaqyn arada balalarǵa júrek pen baýyr transplantasıasyn júrgizý, sondaı-aq aǵza keshenderin transplantattaý josparlanǵan.
Orta eseppen jyl saıyn 200–300 pasıentke aǵza transplantasıasy jasalady. Ómir súrý kórsetkishteri álemniń jetekshi klınıkalarynyń nátıjelerimen salystyrylady: búırek resıpıentterinde — 95–97%, baýyr resıpıentterinde — 85%, júrek resıpıentterinde — 86%.
Jumysty úılestirý úshin barlyq óńirindegi ókildikteri bar Respýblıkalyq transplanttaýdy úılestirý ortalyǵy quryldy, — delingen mınısrlik habarlamasynda.
Densaýlyq saqtaý júıesinde sıfrlandyrý belsendi damýda: donorlar men resıpıentterdi esepke alýdyń aqparattyq júıesi engizildi, ol derekterdi avtomatty túrde salystyrady jáne «kútý paraǵyndaǵy» pasıentter úshin aǵzalardy irikteıdi.
Sonymen qatar, zańnama jetildirilýde: «Halyq densaýlyǵy jáne densaýlyq saqtaý júıesi týraly» Kodekske jáne zańǵa táýeldi aktilerge qajetti ózgerister engizildi.
Alaıda aǵza donorlyǵynyń jetispeýshiligi áli de negizgi másele bolyp otyr. Qazaqstanda qaıtys bolǵannan keıingi donorlyq deńgeıi tómen kúıinde qalyp otyr, al bul túıtkildi tek birlesken kúsh-jiger arqyly ǵana sheshý múmkin.
Sarapshylardyń aıtýynsha, sheshýshi ról qoǵamǵa tıesili. Sondyqtan donorlyq júıege degen senimdi kúsheıtý, onyń etıkalyq negizderin túsindirý jáne qalyptasqan mıfterdi seıiltý erekshe mańyzdy.
Bul úderiste qarapaıym shyndyqty jetkize alatyn dárigerlerge, dinı qyzmetkerlerge, áleýmettanýshylarǵa, psıhologtarǵa jáne buqaralyq aqparat quraldaryna erekshe mısıa júkteledi: bir ǵana sheshim birneshe adamnyń ómirin qutqaryp qalýy múmkin.