Almatyda «Týberkýlezsiz Ortalyq Azıa: ulttyq jetistikterden óńirlik kóshbasshylyqqa» atty halyqaralyq konferensıa jáne Shyǵys Eýropa men Ortalyq Azıadaǵy týberkýlezge arnalǵan parlamenttik samıt ótti, dep habarlaıdy aqshamnews.kz DSM-ne silteme jasap.
İs-sharaǵa óńir elderiniń parlament depýtattary, densaýlyq saqtaý mınıstrlikteriniń ókilderi, DDSU, Stop TB seriktestigi jáne ózge de halyqaralyq uıymdardyń sarapshylary qatysty. Jıynda BUU-nyń týberkýlezge qarsy Saıası deklarasıasyn (2023 j.) iske asyrý barysy, azamattyq qoǵamnyń róli jáne jańa tehnologıalar talqylanǵan.
«Forým qorytyndysynda 2026-2028 jyldarǵa arnalǵan týberkýlezge qarsy kúresti jedeldetý jónindegi óńirlik qarar qabyldandy. Onyń basty maqsaty – 2030 jylǵa qaraı týberkýlezdi túbegeıli joıý», - dep habarlaıdy mınıstrlik.
QR Densaýlyq saqtaý mınıstrliginiń birinshi vıse-mınıstri Tımýr Sultanǵazıevtiń aıtýynsha, bul qarar arqyly Ortalyq Azıa elderi týberkýlezdi joıýda kóshbasshyǵa aınala alady.
Mınıstrliktiń málimetinshe, Qazaqstan BUU qoıǵan týberkýlez boıynsha negizgi kórsetkishterge merziminen buryn qol jetkizdi. 2024 jyly elimizde osy dertti juqtyrǵandardyń sany 4%, ólim-jitim 16,6% tómendegen. Alǵash ret týberkýlezden bala ólimi tirkelmedi. Bul jetistik sońǵy dıagnostıkalyq ádisterdi engizý jáne tabletkamen emdeý rejıminiń arqasynda múmkin boldy.
Sondaı-aq ambýlatorlyq em alyp júrgen naýqastardyń 99%-y áleýmettik kómekpen qamtylǵany atap ótildi. Qazaqstan ÚEU-ǵa arnalǵan memlekettik tapsyrys kólemin bir jarym esege arttyrdy. Degenmen, osal toptarmen jumys pen azamattardyń densaýlyǵyna degen jaýapkershiligin kúsheıtý qajet ekeni aıtyldy.
«Saıası erik – týberkýlezben kúrestiń eń kúshti quraly. Biz 2030 jylǵa qaraı bul dertti joıýǵa mindettimiz», – deıdi Global TB Caucus uıymynyń tóraǵa orynbasary, depýtat Gúldara Nurymova.