Dana Qaraǵusova Qazaqstannan ǵaryshqa týrıs retinde ushatyn alǵashqy áıel atanady, dep habarlaıdy aqshamnews.kz kursiv.media-ǵa silteme jasap.
Kásipker New Shepard kemesiniń ekıpajy quramyna kirdi. Amerıkalyq Blue Origin kompanıasy osymen 36-márte týrıserdi orbıtaǵa alyp shyǵady. Mısıa týraly kompanıanyń baspasóz qyzmeti habarlaıdy.
Qaraǵusovamen birge ǵaryshǵa kásipker Djeff Elgın, ınjener Klınt Kellı III, startaptar negisiz qalaýshy Aaron Núman, ýkraın kásipkeri Vıtalıı Ostrovskıı jáne taǵy bir jolaýshy kóteriledi. Ol aty-jónin qupıa ustaýdy jón kórdi.
«Adamzat bolashaǵy ǵaryshpen baılanysty»
Dana Instagram-daǵy paraǵy ǵaryshqa sapary jaıly bylaı dep jazdy:
«Adamzattyń bolashaǵy ǵaryshpen baılanysty. Jańa kókjıekterdi baǵyndyrý arqyly biz tehnologıalardy ǵana damytyp qoımaı, jeke múmkindigińizdi keńeıte túsemiz. Men úshin Blue Origin-niń NS-36 mısıasy – zertteý jobasynyń bir bóligi, sonymen birge uzaq jyldar boıy talpynyp kele jatqan armanyma jaqyndaı túsý», – dep jazdy bolashaq ǵarysh týrısi.
Ekıpaj quramy týraly málimet boıynsha, Dana Qaraǵusova 25 jyldan astam ýaqyt boıy medıa, dıstrıbýsıa jáne túrli sharalardy uıymdastyrýmen aınalysqan. Ol Portals, mýltımodaldy ekojúıesiniń negizin qalaǵan. Júıe óner men ǵylymdy sıfrly tetikter arqyly biriktiredi.
Kásipkerlikten bólek, Qaraǵusova álpınıs retinde de tanymal. Ol Kılımandjaro men Elbrýsty baǵyndyrǵan. Dana shyńǵa shyǵýdy ishki kúshin synaýdyń bir amaly dep qarastyrady. Endi qazaq qyzy ǵaryshqa umtylady. Kásipker ony «ermek emes, adamzattyń jańa evolúsıasy bastalatyn shekara» dep biledi.
NS-36 mısıasy – New Shepard baǵdarlamasynyń 15-sapary. Osy joba aıasynda Blue Origin ǵaryshqa 75 adamdy alyp shyqty. Bes jolaýshy eki márte kókke kóterilgen.
Keme ushatyn kún keıin jarıalanady. Sapar BlueOrigin.com saıtynda, sonymen birge áleýmettik jeliler men YouTube platformasynda kórsetiledi.
Buǵan deıin Kursiv.Media Qazaqstan tarıhynda alǵashqy ǵaryshker qyzdar toby qurylǵanyn jazǵan. Arýlar ǵaryshqa ushpasa da, jerdegi modýlde jattyǵady. SANA-1 dep atalatyn synaq 10 táýlikke sozylady.
Wikipedia.org saıtynda Dana Qaraǵusova eks-depýtat Gúljan Qaraǵusovanyń qyzy ekeni jazylǵan.