Qazaqstan Prezıdenti Qasym-Jomart Toqaev halyqqa Joldaýynda eldiń damýyna qatysty jańa mindetter júktedi. Basty nazar – sıfrlandyrýǵa, jasandy ıntellektini engizý men ekonomıkany turaqty damytýǵa aýdaryldy. Joldaýda saıası ózgerister, ınvestısıa tartý men ınfraqurylymdy jańartý jaǵy aıtyldy. Óńirlik komýnıkasıalar qyzmetinde Almaty qalasy Azamattyq alánsynyń tóraǵasy Qaıyrjan Abdyhalyqov osyǵan toqtaldy.
Prezıdent eldegi barlyq salany qamtıtyn úlken jospar usyndy. Onyń sózinshe, Qazaqstannyń alǵa jyljýy sıfrlyq tehnologıalar men jasandy ıntellektini qoldana bilýimizge baılanysty.
Joldaýda jasandy ıntellekt jáne sıfrlyq damý mınıstrligin qurý usynyldy. Bul mınıstrlik sıfrlandyrý isin úılestirip, aýyl sharýashylyǵy, bilim berý, turǵyn úı-kommýnaldyq sharýashylyq pen sý resýrstary sıaqty birneshe salaǵa jaýapty bolmaq.
Toqaev ónerkásiptiń damýyna erekshe toqtaldy. Onyń aıtýynsha, jańa tehnologıasyz ekonomıkany ártaraptandyrý múmkin emes. Aýyl sharýashylyǵynda da ózgeris bolady. Ǵylymı ortalyqtar bazasynda agrotehnologıalyq hab qurylyp, sý resýrstaryn baqylaý úshin sıfrlyq júıeler engizilmek.
«Prezıdent kólik pen logıstıka salasynyń bolashaǵyn atap ótti. Qazaqstan aımaqtaǵy basty torapqa aınalýy tıis. Ol úshin jańa jol salynyp, saýdaǵa qolaıly jaǵdaı jasalady», – dep atap ótti spıker.
Eski sý men komýnaldyq júıelerdi jańartý josparlanyp, energıany únemdeıtin jańa tehnologıalar da engiziledi.
Joldaýda maman tapshylyǵy da aıtyldy. Keı salada bilikti kadr jetispeıtindikten, sheteldik mamandardy tartýǵa týra keledi. Prezıdenttiń aıtýynsha, bul qadam ǵylym men óndiristi damytýǵa kómektespek.
Sondaı-aq, jol-kólik qaýipsizdigi máselesi de qozǵaldy. Endi elektrosamokattar men kıksherıngke baılanysty zań qatańdamaq.
Syrtqy saıasatta Qazaqstan áriptestik baılanystardy jalǵastyrady. Reseı, Qytaı, AQSH, Eýropa elderi, Úndistan, Taıaý Shyǵys jáne Ortalyq Azıa memleketterimen qarym-qatynas nyǵaıady. Jyl sońyna deıin birneshe eldiń basshysy Qazaqstanǵa saparlap kelmek.
Prezıdent saıası ózgeristerge de toqtaldy. Parlamenttik reforma bastalyp, oǵan sarapshylar men qoǵam ókilderi atsalysady. 2027 jyly referendým ótip, onda Parlamenttiń jańa qurylymy anyqtalady.
“Bul Joldaý Qazaqstannyń jańa damý baǵytyn aıqyndaıdy. Ol sıfrlyq tehnologıany damytýǵa, ekonomıka men saıasatty jańǵyrtýǵa múmkindik beredi», – dedi aláns tóraǵasy.