Respýblıka aýmaǵynda zańdy túrde pana alǵan barlyq sheteldikter Qazaqstannyń bosqyndarǵa qatysty halyqaralyq qoǵamdastyq aldyndaǵy mindettemelerine sáıkes memleket tarapynan qorǵaýmen jáne qoldaýmen qamtamasyz etilgen, dep habarlaıdy aqshamnews.kz.
1998 jylǵy 15 jeltoqsanda Qazaqstan BUU-nyń 1951 jylǵy «Bosqyndar mártebesi týraly» konvensıasyna resmı túrde qosylyp, ózine belgili bir mindettemeler aldy.
Qazaqstan aýmaǵyndaǵy pana izdeýshiler men bosqyndardyń quqyqtyq jaǵdaıyna oraı týyndaǵan qoǵamdyq qatynastary bosqyndar quqyǵy salasyndaǵy halyqaralyq zańnama qaǵıdattaryna negizdelip qabyldanǵan «Bosqyndar týraly» Zańmen retteledi. Bul qaǵıdattar atap aıtqanda: jer aýdarylmaý, bosqyn mártebesin berýdiń ashyqtyǵy men qoljetimdiligi, kemsitpeýshilik, aqparattyń qupıalylyǵy, otbasynyń birligi jáne bosqyndardyń balalarynyń quqyqtaryn qorǵaý sekildi máselelerdi qamtıdy.
Qazirgi ýaqytta Qazaqstanda pana izdegen 265 adam jáne 301 bosqyn ómir súrýde. Olardyń kópshiligi Almaty qalasy men Almaty oblysynda turady.
Bizdiń Respýblıkamyzdaǵy pana izdeýshiler men bosqyndarǵa tegin medısınalyq kómektiń kepildik berilgen kólemi sheńberinde medısınalyq kómek jáne qoldanystaǵy zańnamaǵa sáıkes ataýly áleýmettik kómek kórsetiledi.
Sonymen birge bosqyndar men pana izdeýshiler eńbek bostandyǵy men kásipkerlik qyzmetke de quqyly bolady. Olardyń elimizde bolatyn basqa sheteldikterden aıyrmashylyǵy, olarǵa eńbek qyzmetin júzege asyrýǵa jergilikti atqarýshy organnyń ruqsatyn alý talap etilmeıdi.
Qazaqstan zańnamasy barlyq balalardyń, onyń ishinde bosqyndar men baspana izdep júrgen adamdardyń balalarynyń tegin negizde mektepke deıingi, bastaýysh, jalpy orta bilim alýǵa, sondaı-aq konkýrstyq negizde joǵary jáne joǵary oqý ornynan keıingi bilim alýǵa quqyǵyn qamtamasyz etedi.
Bosqyndar Qazaqstan Respýblıkasynyń azamattyǵyn alýǵa jáne turaqtap qalýǵa ótinish jasaýǵa quqyly. Qujattardy tapsyrý kezinde olarǵa shyqqan elinde sottalmaǵandyǵy týraly anyqtama usyný talap etilmeıdi.