Qazaqstanda kúmis óndirý aıtarlyqtaı tómendedi.
Óndiris kólemi qatarynan ekinshi jyl kúrt tómendep, 2011 jyldan beri eń tómengi kórsetkishke jetti, dep habarlaıdy aqshamnews.kz.
Energyprom sarapshylarynyń málimeti boıynsha, 2024 jyldyń qańtarynan tamyz aıyna deıin elimizde 484,4 tonna kúmis óndirilgen. Bul 2023 jyldyń sáıkes kezeńimen salystyrǵanda 23,5%-ǵa az. Ótken jyly da óndiris 8,6%-ǵa tómendegen bolatyn. Sońǵy 13 jylda Qazaqstan kúmis óndirý deńgeıi eń tómengi kórsetkishke deıin tómendedi.
Qazaqstanda kúmis negizinen basqa metaldardy — mys, qorǵasyn, altyn jáne taǵy basqa resýrstardy óndirý kezinde qosalqy ónim retinde alynady. Elimiz TMD elderi arasynda kúmis óndirýdiń 23,9%-yn qamtamasyz etedi jáne álemde 12-orynda tur (birinshi orynda Meksıka, ekinshi orynda Qytaı).
Ótken jyly búkil álemde kúmis óndirý 0,7%-ǵa azaıǵan. Bul metalǵa degen suranys kóbinese ónerkásip salasymen baılanysty: kúmis qazirgi tańda kún panelderin, elektromobılderdi, uıaly telefondardy jáne basqa da qurylǵylardy óndirýde keńinen qoldanylady.
Qazaqstanda mundaı ónerkásipter joqtyń qasy. Sondyqtan eldegi kúmistiń basym bóligi shetelge eksporttalady. 2023 jyly Qazaqstannan 389,5 tonna kúmis eksporttalyp, negizinen AQSH pen Ulybrıtanıaǵa jiberilgen.
Qazaqstannyń sońǵy ýaqytta altyndy eksporttaǵan jalǵyz el ekeni anyqtaldy.