300 myń beıresmı jumyspen qamtylǵan adamdy áleýmettik qorǵaýdy qamtamasyz etýge múmkindik beredi.
Qazaqstanda Áleýmettik kodeks jobasy sheńberinde halyqty ıkemdi jáne platformalyq jumyspen qamtýdyń jańa túrleri úshin jaǵdaılar jáne jumyskerlerdi áleýmettik qorǵaý sharalary zańnamalyq deńgeıde qalyptastyrylyp, bekitiletin bolady, dep habarlaıdy Almaty-akshamy.kz.
Áleýmettik kodekstiń jobasynda halyqtyń jekelegen osal sanattaryna jumyspen qamtýǵa járdemdesý saıasatynan barlyq eńbekke qabiletti azamattardyń nátıjeli jumyspen qamtylýy úshin teń bastapqy jaǵdaılar jasaýǵa kóshý kózdeledi.
Birinshi. Platformalyq jumyspen qamtýdy qosa alǵanda, quqyqtyq óriste jumyspen qamtýdyń ıkemdi nysandaryn bekitý. Jumys berýshiler tarapynan teris paıdalanýǵa jol bermeý maqsatynda eńbekti uıymdastyrýdyń mindetti sharttary bekitiletin jáne jumyspen qamtýdyń ıkemdi nysandary úshin nysanaly toptar aıqyndalatyn bolady.
Ekinshi. Jumys sıpatyna qaramastan, jumyskerlerdiń eńbek quqyqtaryn tolyq qorǵaýdy qamtamasyz etý, atap aıtqanda, platformalyq jumyspen qamtý, birlesken jumys (bir jumys ornynda jumys isteıtin eki adam), jyljymaly keste, tórt kúndik jumys aptasy jáne basqalar.
Úshinshi. Onlaın-platformalarmen standartty jarıa túrdegi shart arqyly ınternet-platformalar negizinde jumys isteıtin adamdardy tanýdyń jáne áleýmettik aýdarymdardyń (Biryńǵaı jınaqtaýshy zeınetaqy qoryna, memlekettik áleýmettik saqtandyrý qoryna jáne áleýmettik medısınalyq saqtandyrý qoryna) bolýyn anyqtaýdyń qarapaıym rásimin engizý.
Tórtinshi. Tabysqa salynatyn tómendetilgen salyqtyq júktemeni kózdeıtin birikken tólemdi engizý esebinen salyqtardy, zeınetaqy jáne áleýmettik aýdarymdardy tóleý tetigin barynsha ońaılatý usynylady. Bul rette biryńǵaı jıyntyq tólemdi alyp tastaý da josparlanýda.
Besinshi. Jumystan aıyrylý (joǵalǵan kiristiń 40-tan 45%-ǵa deıin), júktilik jáne bosaný kezinde kiristen aıyrylý (100%) táýekelderi týyndaǵan jaǵdaıda qyzmetkerlerdi áleýmettik saqtandyrý júıesinen tólenetin joǵary tólemdermen qamtý kózdeledi, sondaı-aq bala kútimi boıynsha áleýmettik tólemderdiń uzaqtyǵy 1 jastan 1,5 jasqa deıin ulǵaıady.
Atalǵan sharalar eńbek qatynastaryn jeńildetilgen resimdeý men jańa yntalandyrýlar esebinen engizýdiń birinshi kezeńiniń ózinde-aq qyzmetin resmılendirýge jáne keminde 300 myń beıresmı jumyspen qamtylǵan adamdy áleýmettik qorǵaýdy qamtamasyz etýge múmkindik beredi.
Barlyq osy jańa engizilimderdiń maqsaty – eńbek etetin qazaqstandyqtardy áleýmettik saqtandyrý jáne zeınetaqymen qamsyzdandyrý júıesine qosý arqyly olardy áleýmettik qorǵaýdy qamtamasyz etý ekenin atap ótý qajet.